Tuesday, March 15, 2005

جسٹس لیگ، لمیٹد

آجکل میں جسٹس لیگ کا پہلا سیزن دیکھ رہا ہوں۔ پائلٹ (سیکرٹ بگنّنگز) کو بیان کرنے کے لیے میرے پاس الفاظ نہیں ہیں۔ اس قدر کمال کی اینیمیشن، اتنے پرکشش کردار، اور اتنی اعلی داستان نگاری میرے مشاہدے میں تو نہیں ہیں۔ ابتدا میں جسٹس لیگ میں سات کردار ہیں: سوپرمین، بیٹ مین، ونڈر وومن، ہاک گرل، فلیش، گرین لینٹرن اور جان جونز۔ ہاک گرل کا کردار کچھ کمزور لگا لیکن باقی سب اتنے مکمل ہیں کہ جیسے ڈی۔سی کامکس کے صفحوں سے ابھی ابھی اٹھ کے آئے ہوں۔


اور بیٹ مین، آہ بیٹ مین۔ بالکل باب کین اور فرینک ملر کا بیٹ مین ہے۔ ان تاریک دہائیوں کا کردار نہیں جو کسی جوکر کی مانند تھا۔ اور جان جونز کی تنہائی، ایک عظیم نسل کے آخری فرد کی تنہائی، کچھ ایسی پراثر ہے کے دیکھنے والا ایک عجیب سی اداسی میں مبتلا ہوجاتا ہے۔

جسٹس لیگ کے دو ہی سیسن ہوئے تھے کہ کسی حکیم کو خیال آیا کہ اس شو کو بدلنے کی اشد ضرورت ہے۔ اور پھر جسٹس لیگ انلمیٹڈ کا آغاز ہوا۔ انلمیٹد معیار میں تو جسٹس لیگ کے برابر ہے۔ لیکن اس کا مرکزی خیال یہ ہے کہ چھے سوپر ہیرو دنیا کے تمام مسائل حل کرنے کے لیے ناکافی ہیں۔ تو جناب جسٹس لیگ کو بڑھانے کی ضرورت ہے۔ دنیا کے تقریبا تمام سوپرہیرو اب لیگ کے رکن ہیں۔ پہلے شو کی بڑی خوبی یہ تھی کہ ہر ایک کردار کو ابھرنے کا پورا موقع ملتا تھا۔ لیکن اب، سیکڑوں کرداروں کے ساتھ، کسی ایک کردار کو بہت کم وقت ملتا ہے۔ اور سیدھی سی بات ہے۔ معمولی کرداروں (مثلا بوسٹر گولڈ!) کے لیے تو کوئی جسٹس لیگ نہیں دیکھتا۔ میرا جیسا ناظر تو جانے پہچانے ناموں (بیٹ مین!) کے لیے جسٹس لیگ کا مداح ہے۔

کارٹون نیٹورک کے اعلی حکام سے میری گزارش ہے۔ انلمیٹڈ چھوڑ کر اس آسان وقت کو لوٹ جائیے جب لیگ کے جانے پہچانے سات رکن تھے۔ میرے لحاظ سے تو جسٹس لیگ لمیٹد ہی بہتر تھا۔

تبصرے  (3)

Blogger Jalal

Excellent blog.

1:57 AM  
Anonymous Anonymous

Justice League Unlimited really looks bad.
Teen Titan, on the other hand, deserves your attention.

sepoy

9:14 PM  
Blogger ضیا

شکریہ سپوئے۔ لیکں اس قدیم عمر میں میں ٹین ٹائٹنز دیکھتا ہوا کچھ اچھا نہیں لگوں گا۔ (ویسے تو یہ جسٹس لیگ کے بارے میں بھی کہا جاسکتا ہے مگر۔۔۔)۔

10:33 PM  

تبصرہ کیجیے

کیفے حقیقت