کیفے حقیقت

خدا آرہا ہے!

2005-09-14T22:04:00.000-05:00

خدا آرہا ہے۔

اور اپنے ساتھ ڈونٹس لارہا ہے۔

اسرائیل

2005-09-06T20:28:00.000-05:00

دانیال نے اسرائیل۔پاکستان مزاکرات سے متعلق اردو بلاگرز کے لیے کچھ سوالات کھڑے کیے ہیں۔ ان کے جواب دے رہا ہوں۔

اسرائیل سے بات کیوں نہیں ہونی چاہئیے؟

ہونی چاہیے اور بلاخوف و ججھک ہونی چاہیے۔

* * *

استنبول ملاقات سے پہلے آپ نے کتنی مرتبہ اپنے بلاگ پر فلسطین کے بارے میں کیا کچھ لکھا ہے؟ لنکس فراہم کریں۔

اردو میں افسوس صرف ایک مرتبہ۔ فلسطینی حقِ واپسی کے بارے میں عام پاکستانی خیالات میں مجھے منافقت نظر آتی ہے۔ انگریزی میں پچھلے سال فرائڈے ٹائمز میں ایک مضمون لکھا تھا۔ جو دستیاب نہیں ہے۔ لیکن اس بلاگ پر اس کے چند اقتباسات ہیں۔

* * *

اسرائیل سے مذاکرات نہ کرنے سے پاکستان کو کیا فوائد حاصل ہوسکتے ہیں؟ یا امت مسلمہ کو کیا فوائد حاصل ہوسکتے ہیں یا فلسطینیوں کو کیا فائدے حاصل ہوسکتے ہیں؟

اسرائیل سے مزاکرات نہ کرنے سے پاکستان، امّت یا فلسطینیوں کو کوئی فائدہ نہیں ہوگا۔ الٹا پاکستان کے دشمنوں کو یہ کہنے کا موقع ملے گا (اور ملتا ہے) کہ یہ لوگ ساتویں صدی سے آگے سوچ ہی نہیں پاتے۔

* * *

آپ ذاتی طور پر کتنے اسرائیلیوں کو جانتے ہیں؟

تین۔ اس کے علاوہ کئی امریکی یہودیوں کو بھی جانتا ہوں، اکثر کو دوست بھی سمجھتا ہوں۔

* * *

اسرائیل اور فلسطین کے تنازعے اور اسرائیلی نقطہ نظر کے بارے میں آپ کیا جانتے ہیں؟

اسرائیل اور فلسطینی تاریخ پر میں نے کئی کتابیں پڑھی ہیں۔ جن میں اسرائیلی اور فلسطینی، دونوں فریقین کے نقطہِ نظر شامل ہیں۔ اس کے علاوہ اخبارات اور رسائل کا مطالع کرنے کی بھی کوشش کرتا ہوں۔

صبح آزادی

2005-08-15T21:46:00.000-05:00

یہ داغ داغ اجالا، یہ شب گزیدہ سحر
وہ انتظار تھا جس کا، یہ وہ سحر تو نہیں
یہ وہ سحر تو نہیں جس کی آرزو لے کر
چلے تھے یار کہ مل جائے گی کبھی نہ کبھی

فیض

جشنِ آزادی مبارک

ایک نظم

2005-08-09T22:03:00.000-05:00

اے وزرڈ آف ارتھسی سے ایک نظم کا ترجمہ۔

صرف خاموشی میں لفظ،
صرف اندھیرے میں روشنی،
صرف موت میں زندگی۔
روشن عقاب کی پرواز،
خالی آسمان پر۔

کون سا بہتر ہے؟

2005-07-16T11:21:00.000-05:00

اعظمی صاحب کی آج ای۔میل آئی۔ موضوع تھا: کون سا بہتر ہے؟ ترجمہ کچھ یوں ہے۔

کہا جاتا ہے کہ شہزاد تنویر، لندن کا خودکش دہشت گرد، بہت مزہبی تھا۔ اکثر مسجد جایا کرتا تھا۔ اسے لڑکیاں بالکل پسند نہیں تھیں۔

میرا سترہ سالہ بیٹا شہزاد اعظمی بالکل مزہبی نہیں ہے۔ کبھی مسجد نہیں جاتا۔ اسے لڑکیاں بہت پسند ہیں۔

کون سا شہزاد بہتر ہے؟

ظاہر ہے اعظمی صاحب، آپ کا شہزاد بہتر ہے۔ بس اسے مسجد سے دور رکھیے۔

اینجِل: سمائل ٹائم

2005-07-12T19:47:00.000-05:00

کچھ دنوں پہلے میں نے اینجِل کے آخری سیزن کی قسط سمائل ٹائم دیکھی۔ جو لوگ شو سے ناواقف ہیں، ان کے لیے یہ کہتا چلوں کہ اینجِل بفی دا ویمپائر سلیئر (میرا پسندیدہ شو!) سے منسلک ہے۔ بفی کا سابقہ بوئےفرینڈ، روح رکھنے والا ویمپائر اینجِل، لوس اینجلس (سٹی اوف اینجلز!) میں دکھی انسانیت کی مدد کرتا ہے۔

سمائل ٹائم کی کہانی نہایت مزاحیہ ہے۔ جادو کے ذریعے اینجِل، لمبا چوڑا طاقتور اینجِل، غلطی سے ایک کٹ پتلی میں تبدیل ہو جاتا ہے! چند سین دیکھ کر تو میرا ہنس ہنس کر برا حال ہوگیا۔ ایک سین کا ذکر کرتا چلوں: اینجِل اور بھتنا کٹ پتلا لڑائی میں مصروف ہیں۔ کٹ پتلا اینجِل کو تڑی دیتا ہے :میں تمہیں نیا کٹ پتلی سراخ پھاڑ دوں گا، کتیا! (پورے مزے کے لیے اس فقرے کا انگریزی میں ترجمہ کیجیے۔)

بہرحال نہایت عمدہ قسط تھی۔ اس کو ہیوگو ایوارڈ کے لیے نامزد کیا گیا تھا۔

خطِ نامنظوری

2005-07-09T08:45:00.000-05:00

کل مجھے ایک جانا پہچانا خط ملا۔ جس کا ترجمہ کچھ یوں ہے۔

ڈیر مز احمد،

ہمیں اپنا مسوّدہ بھیجنا کا بہت شکریہ۔ مجھے یہ اپنی حالیہ ضروریات کے لیے کچھ ٹھیک نہیں لگا۔

خلوص سے،

سٹینلی شمڈ
مدیر

اس مرتبہ مسٹر شمڈ نے "فارم" خط کا استعمال کیا ہے۔ اسے پڑھنے کے بعد کچھ دیر (یعنی پانچ منٹ کو) میری حالت سالیری جیسی ہوگئی۔ آماڈئیس کے اس سین میں جب وہ اپنا ایمان کھو بیٹھتا ہے۔ اور ایک سلیب کو آگ لگا دیتا ہے۔ ان چند منٹوں کو سٹینلی شمڈ میرے خدا تھے اور مسترد مسوّدہ میری سلیب۔

لیکن پھر جذباتی گھٹا اٹھی۔ سٹینلی شمڈ اب بھی خدا ہیں اور میں نااہل بندہ۔ میری کیا مجال کہ ان سے ناراض ہوں؟ اینالوگ کی جنّت کے لیے کوشش جاری رکھوں گا۔

ویسے تو دا لیفٹ ہینڈ آف ڈارکنس جیسے شاہکار کو ان الفاظ میں رد کیا گیا تھا۔ تمام ناکام اور اناڑی لکھنے والوں کو اس سے تسکین ملتی ہے۔

مختار مائی

2005-07-08T21:06:00.000-05:00

ہماری گریجوئیٹ اسمبلی ممبران، بینکار وزیرِ اعظم، اور شہنشاہ صدر سے کہیں زیادہ دلیر اور انسان دوست تو میروالا کی وہ عظیم ہستی ہیں جن پر سارے پاکستان کو فخر کرنا چاہیے۔

میں کہتا ہوں صدرِ پاکستان کاغزی جرنیل کو نہیں، مختار مائی کو ہونا چاہیے۔

ایبی کا کراچی

2005-06-29T16:51:00.000-05:00

ایبی کا کراچی سفرنامہ اب گوگل وِڈیو پر دستیاب ہے۔

ہماری تاریک تاریخ

2005-06-26T17:31:00.000-05:00

برِ صغیر میں غلامی کی تاریخ پر ایک آنکھیں کھولنے والا مضمون۔

ایک ہیرو کی پیدائش

2005-06-15T17:52:00.000-05:00

آج میں نے بیٹ مین بگنز دیکھی۔

جیسا کہ میں پہلے لکھ چکا ہوں، جوئل شوماکر نے ایک عظیم فرینچائیز کا بیڑا غرق کردیا تھا۔ پچھلی دو فلمیں ڈی سی کامکس پڑھنے والوں کے منہ پر تمانچہ تھیں۔ لیکن آج میں خوشی سے کہ سکتا ہوں کہ بیٹ مین، باب کین اور فرینک ملر کا بیٹ مین، ایک بار پھر اٹھ کھڑا ہوا ہے۔ کرس نولن کی شاندار ہدایت کاری اور کرسچن بیل کا بروس وین سچّے مداحوں کو مایوس نہیں کریں گے۔

کہانی کے بارے میں کیا کہوں؟ کچھ عناصر تو سیدھے ائیر ون سے لیے گئے ہیں۔ وہ بدنصیب رات جب ٹومس اور مارتھا وین ایک تاریک گلی میں بےدردی سے قتل کردیے جاتے ہیں فلم کا مرکزی سین ہے۔ مارتھا کا موتیوں کا ہار، سڑک پر بہتا خون، ایک عام مجرم کے آگے زندگی کی بےمعنی حیثیت، اور دس سالہ بروس کی بےبسی، سب کے سب ویسے ہی ہیں جیسا کامک پڑھنے والے اپنی آنکھوں کے آگے سینکڑوں بار دیکھ چکے ہیں۔ اور فلم کے آخری حصّے میں ناظرین نو مینز لینڈ کا دھیما سا عکس پائیں گے۔

لیئم نیسن نے راس الغل کی اچھی عکاسی کی ہے۔ لیکن بہترین مجرم کا انعام اس نئے اداکار کو ملتا ہے جو ڈاکٹر جونیتھن کرین کا کردار ادا کررہے ہیں۔ ایسا حیبت ناک سکئیرکرو ہے کہ دیکھنے والے کو عرصے تک ڈرائے رکھےگا۔

ظاہر ہے کہ یہ ایک ہالیووڈ فلم ہے۔ اسلیے کچھ کمزوریوں کا شکار ہے۔ عوام کو خوش کرنے کے لیے دھماکے اور تیزرفتار گاڑیاں درکار ہیں۔ جوکہ شایاد کردار کے مطابق نہیں۔ لیکن ان کمزوریوں (اور کیٹی ہومز) کے باوجود بیٹ مین بگنز ایک عمدہ فلم ہے۔ آج ایک ہیرو دوبارہ سے پیدہ ہوا ہے۔

"ذ" پر پابندی

2005-06-13T18:05:00.000-05:00

یہ اردو میں "ز" اور "ذ" دونوں کی کیا ضرورت ہے؟ ویسے تو میں اس بحث میں "ض" اور "ظ" کو بھی لاسکتا ہوں، لیکن کم ازکم یہ حروف شکل میں تو ایک دوسرے سے مختلف ہیں۔ "ز" اور "ذ" کے بارے میں یہ نہیں کہا جاسکتا۔ کمپیوٹر پر پڑھے جانے والے عام فونٹوں پر تو "ز" اور "ذ" بالکل ایک جیسے لگتے ہیں۔ حال ہی میں جہانزیب نے میری غلطی پکڑی جہاں میں نے "مذاق" کے بجائے "مزاق" لکھا تھا۔ میں کہتا ہوں غلطی میری نہیں، بابائے اردو کی ہے۔ (مولوی عبدلحق نہیں، سیکڑوں سال پرانا کوئی بابا ہوگا۔)

بہرحال آج سے میں "ذ" کے خلاف ایک تحریک شروع کرنا چاہتا ہوں۔ یہ حرف غیر ضروری ہے۔ اسے واپس ارب یا ایران بھجوا دینا چاہیے۔ آپ کا کیا خیال ہے؟

مچّھر اور آدمی

2005-06-11T09:06:00.000-05:00

دیسی ٹورنٹس کی سائٹ پر یہ فقرہ نظر آیا۔

ایک مچّھر آدمی کو لیچڑ بنا دیتا ہے۔

نجانے کیوں یہ پڑھنے کے بعد میرا ہنس ہنس کر برا حال ہوگیا۔ کیا بیوقوفی ہے! کراچی کی زبان میں لیچڑ اسے کہتے ہیں جو آپ کے ساتھ چپک جائے، جیسا کہ بِن بلایا مہمان۔ اسے جملے میں استعمال کرتا ہوں۔

بہت رات ہوگئی تھی لیکن طارق لیچڑ ہوکر جانے کا نام ہی نہیں لےرہا تھا۔

لیچڑ کو آپ اسم کی طرح بھی استعمال کرسکتے ہیں۔

بہت رات ہوگئی تھی لیکن طارق لیچڑوں کی طرح بیٹھا رہا۔

لغت کھول کر دیکھی تو معلوم ہوا کہ لیچڑ کے اصل معنی کنجوس کے ہیں۔ اب سوال یہ پیدا ہوتا ہے کہ ایک مچّھر آدمی کو کنجوس یا لیچڑ کیسے بناتا ہے؟

اس کا جواب صرف کراچی کی گرمی کی ایک رات گزارنے والے سمجھ سکتے ہیں۔ ایسی رات جب کے۔ای۔ایس۔سی نے اپنا کمال دکھایا ہو اور ایک مچھر خواب گاہ میں دندناتا پھر رہا ہو۔

بہرحال، پھر بھی یہ فقرہ ایسا تو نہیں کہ ہنس ہنس کر انسان کی آنکھوں سے آنسو بہنے لگیں۔ اگر آپ بھی اسے پڑھنے کے بعد آنکھوں میں نمی پائیں تو مجھے ضرور بتائیے گا۔

جہنم میں گئے ستھ

2005-06-10T20:47:00.000-05:00

نجانے بڑے فلمسازوں کو کیا ہوجاتا ہے۔ فلمبندی کے عام اصول بھول جاتے ہیں۔ بھائی جارج لوکس کا زوال تو ایپیسوڈ وَن سے ہی نمایاں تھا لیکن ہر آنے والی سٹار وارز کی قسط اس زوال کا تالیاں بجا بجا کر اعلان کرتی ہے۔

یہ ایپیسوڈ تھری بھی کیا بلا تھی؟ کیا کسی پاگل چار سالہ بچّے سے اس کی کہانی لکھوائی گئی تھی؟ کیا اداکاروں کا کھانا پینا بند کردیا گیا تھا تاکہ وہ لکڑی کے پتلے ہونے کی شاندار اداکاری کرسکیں؟ کمال کی بات ہے: ایون مکگریگر، نیٹلی پورٹمن، اور ہیڈن کرسٹنسن اپنی اپنی جگہ خوب اداکار ہیں۔ سٹار وارز سے ہٹ کر ان کا کام عمدہ ہے۔ لیکن بھائی لوکس کی ہدایتکاری سب کو مجسموں میں تبدیل کردیتی ہے۔

ایک اور بات: پاڈمے (ملکہ آمیڈالا) پہلی فلم میں تو نہایت مضبوط کردار تھیں۔ لیکن "سِتھ" میں نجانے کیوں ایک بسورتی ہوئی کمزور شخصیت بن گئیں۔ جیسا کہ ایبی نے لکھا ہے، اس فلم میں ایک بھی مضبوط عورت کا کردار نہیں تھا۔ سینیما اور بالخصوص سائینس فکشن سینیما جس بری طرح عورتوں کی عکاسی کرتا ہے وہ قابلِ شرم ہے۔

او کراچی، میری معافی قبول کر

2005-06-05T09:16:00.000-05:00

دنیا کے اخبارات کے مطالع سےتو لگتا ہے کہ کراچی (یا پاکستان) اور آزاد خیالی الٹ ہیں۔ یہاں صرف داڑھی والے خونخوار لوگ تشدّد اور آگ کے لیے جیتے ہیں۔ امریکہ کے جھنڈوں، صدر بش کے پتلوں اور ماچسوں کا کاروبار خوب گرم ہے۔ سڑکوں پر خواتین کی توہین ہونا عام سی بات ہے۔ بھلا ایسی جگہ ایک امریکی لڑکی کے ساتھ کیا سلوک ہوتا ہوگا؟

اگر ایبی کے تجربات حقیقت کی عکاسی کرتے ہیں، تو اخبارات سراسر جھوٹے ہیں۔ سچّی سی بات ہے۔ ایبی کے ساتھ بازار وغیرہ جاتے ہوئے میرے دل میں بھی کچھ خدشات تھے۔ اوّل تو اس کی گوری رنگت کا معاملہ۔ دوسرا اس کے عورت ہونے کا۔ چوک جیسے دیگر جریدے پڑھیں (مثلا یہاں اور یہاں) تو خیال پیدا ہوتا ہے کہ بازار لچر مردوں سے بھرے پڑے ہیں۔ جو عورتوں کا جینا حرام کردیتے ہیں۔ بیہودہ فقرے کستے ہیں۔ سیٹیاں بجاتے ہیں وغیرہ۔ میں عورت نہیں (واقعی!)۔ اسلیے عورت ہوکر بازاروں میں گھومنے کا تجربہ نہیں رکھتا۔ لیکن اپنے پیارے شہر کے بارے میں کچھ غلط فہمیاں شاید رکھتا تھا۔

لوگوں نے ایبی کے ساتھ وہی سلوک کیا جیسے کسی اور کے ساتھ کرتے ہیں۔ یعنی کے سر پلٹ کر بھی نہیں دیکھا۔ سیدھی سی بات ہے، ہر ایک اپنے کاموں میں مصروف ہوتا ہے۔ کس کے پاس اتنا فالتو وقت کہاں ہے کہ آنکھیں پھاڑ پھاڑ کر کسی اور کو گھورے، خواہ وہ ایک غیرملکی عورت ہی کیوں نہ ہو۔ ہم صدر، طارق روڈ اور کلفٹن جیسی جگہوں میں گھنٹون گھومتے رہے۔ زینب مارکیٹ میں تو دوکانداروں کا ایسا رویّہ تھا کہ جیسے روز ہی امریکیوں سے سودا کرتے ہوں۔ حیرت کی بات ہے، کسی نے زیادہ پیسے لینے کی کوشش بھی نہیں کی! ایک قالین والے نے مہمان نوازی کا مظاہرہ کرتے ہوئے ہمیں ٹھندی پیپسی تک پلائی۔ جہاں بھی گئے کسی نے بھی ایسا ظاہر نہیں کیا کہ ہم کوئی انوکھا کام کررہے ہیں یا ایبی کوئی عجب شہ ہے۔

اگر قدامت پسندی کا مظاہرہ دیکھنے میں آیا تو افسوس کہ وہ عام دنیا میں نہیں بلکہ اپنے گھر میں تھا۔ بھابھی نےدبے الفاظ میں کہا کہ خدا کے لیے ایبی کو طارق روڈ تو نہ لےجائیے گا، وہ بھی بغیر ڈوپٹّے کے۔ اور یہ پڑھے لکھے، ڈفینس میں رہنے والے اس تبقے کی نمائندہ ہیں جو اپنے آپ کو "لِبرل" کہتا ہے، اور عوام کو نیچ اور قدامت پسند سمجھتا ہے۔ یعنی عوام کے کردار کا معیار ڈوپٹّے پر آکر رک گیا۔

تو میری معافی قبول کر، شہر کراچی۔ تو آزاد خیال ہے، اور شاید ہمیشہ تھا۔ غلطی تو ہم "پڑھے لکھوں" کی ہے جو اخبارات اور رسائل کے رعب میں آکر تجھے ناجانے کیا سمجھنے لگے ہیں۔

گمشدہ فرد

2005-06-04T10:51:00.000-05:00

اگر آپ اس بلاگ پر باقاعدگی سے آنے والے چار یا پانچ افراد میں سے ایک ہیں تو یقینا میری گمشدگی سے واقف ہوں گے۔ کاش کہ اس گمشدگی کا کوئی دلچسپ سبب ہوتا۔ میں کہ پاتا کہ میں روانڈا میں گوریلوں پر رسیرچ کررہا تھا۔ یا کہ جنوبی امریکہ کے کسی مارکسسٹ گروہ نے مجھے یرغمالی بنا لیا تھا۔ افسوس کہ حقیقی سبب نہایت معمولی ہے۔ شادی کے بعد جب میں اور ایبی کراچی سے لوٹے تو اپنے انٹرنیٹ کنیکشن کو مرگ شدہ پایا۔ پھر کام میں ایسا الجھے کہ اسے صحیح کرانے کی فرصت ہی نہ ملی۔ بالاخر کل کیبل کمپنی سے ایک صاحب آئے اور دنیا سے ہمارا رابطہ بہال کرگئے۔ تو اب میں بلاگ کو توجہ دینے کی پوری کوشش کروں گا۔

اہم اعلان

2005-04-18T13:50:00.000-05:00

پڑھنے والوں کے لیے شاید یہ اعلان اتنا اہم نہ ہو لیکن پھر بھی کہتا چلوں۔ اپریل کی چوبیس تاریخ کو ایبی اور میری شادی ہے! اگر آپ اس روز کراچی میں ہوں اور چائے، کافی اور دیگر ٹھنڈے مشروبات کے خواہشمند ہوں تو پرل کونٹِنینٹل ہوٹل چلے آئیں۔ اور سپریم کورٹ کو اپنی دعائوں میں ضرور یاد رکھیں۔

فلمی شاہکار

2005-04-08T19:51:00.000-05:00

فلم کا نام ہے آماڈئیس۔ اور سالوں سے یہ میرے ذہن پر چھائی ہوئی ہے۔ میرے نزدیک اس کا مرکزی خیال ہلا دینے والا ہے: ایک معمولی انسان جو اپنی معمولیت کی آگ میں دہک رہا ہے اور اپنا ایمان کھو بیٹھا ہے۔

آماڈئیس کا آخری سِین اس مرکزی خیال کی بہت خوبی سے عکاسی کرتا ہے۔ میں نے یہ سِین اردو میں سبٹائٹل کیا ہے۔ آپ اسے یہاں دیکھ سکتے ہیں۔

انٹرویو میم دویم: سوالات

2005-04-08T13:41:00.000-05:00

دانیال، لمبی تاخیر کی معزرت چاہتا ہوں۔ آپ کے لیے سوالات مندرجہ ذیل ہیں۔

اپنے بارے میں ہمیں کچھ بتائیے۔ کیا آپ طالبِ علم ہیں یا نوکری پیشہ؟ تعلیم یا نوکری یا دونوں کے بارے میں وضاحت کریے.
۔حال میں آپ نے کونسی کتب پڑھی ہیں؟
کیا آپ کے خیال سے پاکستان کو ایک اسلامی مملکت ہونا چاہیے جہاں شریعت نافظ ہو یا ترکی اور دیگر یورپی ممالک کی طرح کی سیکیولر ریاست؟
آپ بڑے ہوکر کیا بننا چاہتے ہیں؟ (مجھ سے تو یہ سوال پوچھا ہی نہیں گیا)۔
آجکل ٹیری شیاوہ کی کہانی میڈیا میں چھائی ہوئی ہے۔ زندگی اور موت کے حق کے بارے میں آپ کا کیا خیال ہے؟ کیا زندگی کی کوئی مزہبی حیثیت ہے جس کی بنیاد پر اپنی زندگی کو ختم کرنا جرم ہے یا کیا ہر انسان کو حق حاصل ہونا چاہیے کہ بیماری یا کسی اور صورت میں اپنی زندگی ختم کردے؟

نام میں کیا رکھا ہے؟

2005-03-31T20:10:00.000-05:00

یونیورسٹی آف سنسنیٹی کی باسکٹ بال ٹیم کے ایک کھلاڑی ہیں جن کا نام ہے جہاد محمّد۔ اب سوال یہ کھڑا ہوتا ہے کہ موصوف ہوائی جہاز کا سفر کیسے کرتے ہیں؟

انٹرویو میم

2005-03-25T19:56:00.000-05:00

آصف کے ذریعے اس انٹرویو میم میں شامل ہوا ہوں۔ ان کے سوالات اور میرے جوابات مندرجہ ذیل ہیں۔

آپ کو بیٹھے بٹھائے اردو بلاگ بنانے کا شوق کیوں چرایا؟ مثالیں دے کر وا‍ضح کیجئے۔

جواب نہایت آسان ہے جسے میں ایک لفظ میں دے سکتا ہوں (لیکن دونگا نہیں): احساسِ جرم۔

حال میں کسی نے نہایت سنگدلی سے مجھ سے پوچھا کہ میاں، اردو لکھنا پڑھنا بھی یاد ہے یا سب بھول بھال گئے ہو؟ سچ ہمیشہ کڑوا لگتا ہے۔ بات ذہن میں اٹک سی گئی۔ پہلے کچھ عرصے کمپیوٹر پر اردو لکھنے کی مشق کی۔ جب ٹائیپنگ میں روانی ہوگئی تو بلاگ بنانے کا خیال سوجھا۔ نتیجہ سامنے ہے۔
پروفیسر نوم چومسکی جدید امریکی دانشوروں میں انفرادی سوچ کے حامل ہیں۔ مغرب میں حالیہ صنعتی اور اقتصادی نظام کے بارے میں بالخصوص اور باقی دنیا کے نظاموں کے متعلق بالعموم ان کا خیال ہے کہ رفتہ رفتہ یہ فطری آزادیوں کو سلب کر لیتے ہیں۔ چونکہ آپ بھی مغرب میں قیام پذیر ہیں تو آپ کے اس بارے میں کیا تجربات ہیں؟

پروفیسر چومسکی کبھی کھلم کھلا اقرار تو نہیں کرتے لیکن وہ اینارکو۔سنڈکلزم کے ہامی ہیں۔ یہ وہ نظریہِ حیات ہے جس میں انسان فطری اور باہمی رشتوں میں جڑے ہوئے ہوتے ہیں، طاقت اور استبدادیت سے پرے۔ جدید کیپِٹلسٹ نظام کے بارے میں میرے خیالات سے آپ بخوبی واقف ہیں۔ خصوصا امریکہ میں مجھے اقتصادی اور تکنیکی ترقّی کے فوائد نظر نہیں آتے۔ میرے کہنے کا مطلب یہ نہیں کہ یہاں لوگ سخت غربت کا شکار ہیں۔ لیکن ایسی ترقّی کا کی کیا فائدہ جہاں عام انسان کو مجبورا ہفتے میں پچاس ساٹھ گھنٹے یا دو نوکریوں پر کام کرنا پڑے؟ اصل ترقّی یہ ہے کہ معیشت کی پروڈکشن اس قدر اثر آفرین ہو کہ عام مزدور کو دن میں صرف چھے گھنٹے کام کرنا پڑے۔ یا پھر وہ سال میں ایک مہینے کی چھٹّی لے سکے۔ تاکہ باقی وقت وہ فنونِ لطیفہ یا ادب یا کسی روحانی کام پر صرف کرسکے۔ امریکہ میں یہ چیز دیکھنے کو نہیں ملتی۔ لوگ اس غیرفطری نظام میں اس بری طرح پھنسے ہوئے ہوتے ہیں کہ انھیں زندگی سے لطف اندوز ہونے کا وقت ہی نہیں ملتا۔ ایک اینارکسٹ معاشرے میں نفع کی کوئی جگہ نہیں ہوگی۔ وہاں لوگ صرف اتنا کام کریں گیں جتنا ضروری ہو یا جس میں ان کا دل ہوگا۔

پتہ نہیں کہ میں آپ کے سوال کا صحیح جواب دے پایا ہوں یا نہیں۔ لیکن یہ کہتا چلوں کہ اگر پاکستان سے موازنہ کیا جائے تو یہ تمام بحث کتابی سی ہے۔ کم از کم یہاں کے نظام میں انسان کے کام اور قابلیت کی تھوڑی بہت قدر ہے۔ سوچ اور بڑی حد تک عمل کی مکمل آزادی ہے۔ ایسی آزادی کا شعور پاکستان اور دوسری نئی ریاستوں میں نہیں پایا جاتا کیونکہ وہاں حکومت کے آگے فرد کی کوئی حیثیت نہیں۔ حکومت کا مقصد فرد کی بہتری نہیں بلکہ طاقت کا بےجا استعمال ہے۔
کیا آپ کے خیال میں اسلام کے حالیہ فہم کو کسی بنیادی اصلاح و درستگی کی ضرورت ہے؟ اگر ہے تو سب سے اشد کس چیز میں؟

میں ذاتی طور پر مزہب میں یقین نہیں رکھتا۔ لیکن پاکستانی ہونے کے ناتے اسلام اور اس کی اصلاح کے متعلق نظریات ضرور رکھتا ہوں۔ چند بنیادی باتیں جن سے اسلام اور آجکل کے مسلمان مستفید ہوسکتے ہیں وہ یہ ہیں:

روداری یا قوتِ برداشت۔ اگر دوسرا انسان آپ کے اصولوں کے خلاف بات کررہا ہے تو ضروری نہیں ہے کہ آپ اسے چپ کرائیں یا جان سے مارڈالیں۔ یہاں ایک کہاوت قابلِ ذکر ہے جو عموما وولٹیر کے کھاتے میں آتی ہے: میں آپ سے اتفاق نہیں رکھتا لیکن مرتے دم تک آپ کو اپنی رائے رکھنے کے حق کا دفاع کروں گا۔

صحیفہ آسمانی کو حرف بحرف پڑھنا۔ انجیل میں کئی جگہ لکھا ہے کہ ہم جنس مردوں کو قتل کردیا جائے، ہفتے کے روز کام کرنے والے کو کڑی سزا دی جائے وغیرہ۔ لیکن آج ایسے عیسائی کم ہی ہوں گے جو واقعی ہفتے کے روز کام کرنے والے کو مارنے نکل کھڑے ہوں۔ اسی طرح مسلمانوں کو سمجھنا چاہیے کہ گناہ اور ثواب بندے اور خدا کے درمیان ہے۔ اسلیے قران پڑھ کر چور کا ہاتھ کاٹنا یا زانی کو سنگ سار کرنا کسی بھی لحاظ سے درست نہیں۔ شکر ہے کہ پاکستان میں ایسا نظام تو نہیں لیکن اکثر لوگوں کے ذہنوں میں یہ تصوّر ضرور ہے کہ حکومت اور قانون کاگناہ کا تعین کرنے میں ہاتھ ہونا چاہیے۔ گستاخیِ رسول کا قانون بھی اسی حرف بحرفی کی ایک مثال ہے۔

اور ہاں اگر خواتین کو کمتر سمجھنا ترک کردیں تو میں اپنے مسلمان بھائیوں کا نہایت شکر گزار ہوں گا۔
پاکستان کے مستقبل کو آپ کیسا دیکھتے ہیں؟

میں پاکستان کے مستقبل کے بارے میں نہ تو مایوس ہوں اور نہ پرامّید۔ میرے خیال سے حالات جوں کے توں چلتے رہیں گے۔ امرا امیر ہوتے جائیں گے، غربا غریب۔ بدعنوانی برقرار رہے گی۔ آرمی اور سولین ڈکٹیٹر میوزکل چیرز کا کھیل کھیلتے رہیں گے۔ مجھ جیسے لوگ جو اپنے آپ کو تعلیم یافتہ سمجھنے کی خوش فہمی کا شکار ہیں اپنے کشادہ ڈرائنگ روموں میں بیٹھ کر لمبی چوڑی تقریریں کرتے رہیں گے۔ عام آدمی کی زندگی پر کوئی فرق نہیں پڑے گا۔
آپ کو ڈائس پر کھڑا کر دیا جاتا ہے اور کہا جاتا ہے کہ اپنی حسب منشاء کچھ بھی ارشاد فرمائیں۔ ہم ہمہ تن گوش ہیں۔

(میں آپ سے آپکے پس منظر اور تعلیم کے متعلق پوچھنا چاہتا تھا لیکن سوالات پورے ہوگئے اور ان تمام سوالات میں سے میں کچھ بھی حذف نہیں کرنا چاہتا۔ اگر آپ اضافی طور پر ہمیں بتانا چاہیں تو خوشی ہوگی۔)

شکریہ آصف کہ آپ نے مجھے بلارکاوٹ بک بک کرنے کا موقع دیا۔ میرے پاس کرنے کو ایسی کوئی خاص بات نہیں ہے اسلیے آپ کے پسِ منظر اور تعلیم والے سوال کا جواب دیتا چلوں۔ پسِ منظر خاصا بور ہے۔ میں کراچی میں پلا بڑھا ہوں۔ "اے" لیولز تک تعلیم وہیں حاصل کی۔ اس کے بعد امریکہ چلا آیا، جہاں کمپیوٹر سائنس میں جعلی ڈگری حاصل کرنے کے بعد ایک سافٹویر کمپنی میں ملازمت اختیار کرلی۔

اگر پڑھنے والے اس میم میں شریک ہونا چاہیں تو تبصرہ کر کے مجھے آگاہ کردیں۔ ان کے لیے پانچ عدد وسال تیار کیے جائیں گے جن کے جواب ان کو اپنے بلاگ پر دینے ہوں گے۔ مجھے معلوم ہے کہ انٹرنیٹ پر اردو ابھی اتنی عام نہیں ہے۔ تھوڑی بہت انگریزی سے بھی واقف ہوں۔ اسلیے سوالات اردو یا انگریزی دونوں میں کیے جاسکتے ہیں۔

خاتون کی امامت

2005-03-19T16:40:00.000-05:00

کالج کے پہلے سال کے رمضان میں میں باقاعدگی سے مغرب کے وقت مسجد جایا کرتا تھا۔ شہر کے متّقی مسلمان مفت افتار اور کھانے کا بندوبست کرتے تھے۔ اور مفت کھانے کی رشوت ایک غریب طالب علم کو ایک وقت نماز پڑھوانے کے لیے کافی تھی۔ اس وقت مجھے ایک بات سخت کھٹکتی تھی۔ مسجد تک تو میں اور میری دوست نادیہ ساتھ جایا کرتے تھے۔ اس کے بعد وہ ایک چھوٹے دروازے کے ذریعے عورتوں کے احاطے میں داخل ہوجاتی۔ اور پھر ہماری ملاقات نماز اور کھانے کے بعد ہوتی۔ اس دوران مسجد میں تمام عورتیں چھپی ہوئی، مردوں کی گندی نظروں سے اوجھل، اپنی جگہ بیٹھی رہتیں۔

اس رمضان کے بعد پچھلے سال ایک مسجد پھر جانا ہوا۔ اخبار کے سلسلے میں ایک (مسلمان!) صاحب کا انٹرویو لینا تھا اور ان کا اصرار تھا کہ مسجد میں ملا جائے۔ جب نماز کا وقت ہوا تو مجبورا مجھے بھی نمازیوں کے ساتھ شامل ہونا پڑا۔ اس مسجد میں بھی ماجرا ویسا ہی تھا۔ یعنی خواتین ڈھکی چھپی اپنے احاطے تک محدود تھیں۔ مسجد والے اپنے آپ کو جدّت پسند تصوّر کرتے تھے۔ نماز کے بعد ایک سوال جواب اور دینی مباحثے کا سلسلہ ہوا لیکن ایک بار پھر خواتین اس میں شامل نہ تھیں۔ چڑ تو مجھے بہت آئی لیکن سوچا، میں کون سا نمازی وغیرہ ہوں جو دوسرے لوگوں کو ان کے مزہب کے بارے میں ٹوک سکوں؟

بہر حال، پچھلے ہفتے ایک خبر دیکھنے میں آئی کہ نیویارک میں نماز ادا کی جائے گی جہاں ایک خاتون امامت کریں گی۔ دل بہت خوش ہوا۔ اسلام کو ایسے ہی نڈر اور اصول پرست لوگوں کی ضرورت ہے۔ جو دائیں بازو کے جہلا کی ٹھیکےداری کا بےخوف سامنا کرسکیں۔ میں نے آسرا نومانی کو جھٹ ای۔میل بھیج ڈالی کہ اپنی تحریک کو پھیلانے کی کوشش کریں۔ باسٹن آئیں تاکہ مجھ جیسا گناہگار ایک خاتون کے پیچھے نماز ادا کرسکے۔ کاش وہ دن بھی آئے جب پاکستان کی ہر دوسری مسجد میں ایک خاتون امامت کررہی ہوں۔

لنگوئسٹکس اور انسانی حقوق

2005-03-16T18:55:00.000-05:00

ایم آئی ٹی میں ایک انسانی حقوق اور انصاف کا پروگرام ہے۔ ہر سہمائی مشہور شخصیات کے لیکچر منعقد کرتے ہیں۔ کل پروفیسر چومسکی مہمان تھے۔ لیکچر کا عنوان تھا انسانی حقوق اور لنگوئسٹکس کی عالمگیری حیثیت۔ اور ظاہر ہے، پروفیسر چومسکی سے بہتر دونوں موضوعات پر کون بول سکتا ہے؟

ویسے تو یہ عنوان بڑا عمدہ لگتا ہے مگر افسوس کہ لنگوئسٹکس اور انسانی حقوق کا کوئی سیدھا سادھا تعلق نہیں ہے، "نرم" سائینس یا پوسٹ۔موڈرنزم کے مداح خواح کتنا ہی اصرار کریں۔ تو بیچارے پروفیسر چومسکی نے کہا کہ ان دونوں کے درمیان کوئی عام رشتہ تو نہیں ہے اسلیے میں دونوں موضوعات پر علیحدہ علیحدہہ گفتگو کروں گا۔ بات لنگوئسٹکس سے شروع ہوئی۔ ابھی انہوں نے یونیورسل گریمر کا نام لیا ہی تھا کہ ایبی کی آنکھ لگ گئی! میں نے سننے کی پوری کوشش کی لیکن ذیادہ تر مواد مجھ سے بالاتر تھا۔ جب انسانی حقوق کی بات آئی تو پھر جاکر حاظرین میں زندگی کے آثار نظر آئے۔

پروفیسر چومسکی سدا سلامت رہیں۔ ان کی عمر اسّی سے زیادہ ہوگی۔ ویسے تو خوش صحت ہیں لیکن مجھے ہمیشہ ایک عجیب سا خوف لگا رہتا ہے کہ ایک دن آئے گا جب وہ ہمارے ساتھ نہیں ہوں گے۔

جسٹس لیگ، لمیٹد

2005-03-15T21:28:00.000-05:00

آجکل میں جسٹس لیگ کا پہلا سیزن دیکھ رہا ہوں۔ پائلٹ (سیکرٹ بگنّنگز) کو بیان کرنے کے لیے میرے پاس الفاظ نہیں ہیں۔ اس قدر کمال کی اینیمیشن، اتنے پرکشش کردار، اور اتنی اعلی داستان نگاری میرے مشاہدے میں تو نہیں ہیں۔ ابتدا میں جسٹس لیگ میں سات کردار ہیں: سوپرمین، بیٹ مین، ونڈر وومن، ہاک گرل، فلیش، گرین لینٹرن اور جان جونز۔ ہاک گرل کا کردار کچھ کمزور لگا لیکن باقی سب اتنے مکمل ہیں کہ جیسے ڈی۔سی کامکس کے صفحوں سے ابھی ابھی اٹھ کے آئے ہوں۔

اور بیٹ مین، آہ بیٹ مین۔ بالکل باب کین اور فرینک ملر کا بیٹ مین ہے۔ ان تاریک دہائیوں کا کردار نہیں جو کسی جوکر کی مانند تھا۔ اور جان جونز کی تنہائی، ایک عظیم نسل کے آخری فرد کی تنہائی، کچھ ایسی پراثر ہے کے دیکھنے والا ایک عجیب سی اداسی میں مبتلا ہوجاتا ہے۔

جسٹس لیگ کے دو ہی سیسن ہوئے تھے کہ کسی حکیم کو خیال آیا کہ اس شو کو بدلنے کی اشد ضرورت ہے۔ اور پھر جسٹس لیگ انلمیٹڈ کا آغاز ہوا۔ انلمیٹد معیار میں تو جسٹس لیگ کے برابر ہے۔ لیکن اس کا مرکزی خیال یہ ہے کہ چھے سوپر ہیرو دنیا کے تمام مسائل حل کرنے کے لیے ناکافی ہیں۔ تو جناب جسٹس لیگ کو بڑھانے کی ضرورت ہے۔ دنیا کے تقریبا تمام سوپرہیرو اب لیگ کے رکن ہیں۔ پہلے شو کی بڑی خوبی یہ تھی کہ ہر ایک کردار کو ابھرنے کا پورا موقع ملتا تھا۔ لیکن اب، سیکڑوں کرداروں کے ساتھ، کسی ایک کردار کو بہت کم وقت ملتا ہے۔ اور سیدھی سی بات ہے۔ معمولی کرداروں (مثلا بوسٹر گولڈ!) کے لیے تو کوئی جسٹس لیگ نہیں دیکھتا۔ میرا جیسا ناظر تو جانے پہچانے ناموں (بیٹ مین!) کے لیے جسٹس لیگ کا مداح ہے۔

کارٹون نیٹورک کے اعلی حکام سے میری گزارش ہے۔ انلمیٹڈ چھوڑ کر اس آسان وقت کو لوٹ جائیے جب لیگ کے جانے پہچانے سات رکن تھے۔ میرے لحاظ سے تو جسٹس لیگ لمیٹد ہی بہتر تھا۔

جھمپا لاہری سے ملاقات

2005-03-14T18:55:00.000-05:00

پچھلے سال کی بات ہے۔ دا نَیمسَیک پڑھنے کے بعد میں جھمپا لاہری کا دیوانہ ہوگیا۔ پھر اِنٹَرپرٹَر آف مَیلاڈِیز پڑھی تو دیوانگی جنون تک پہنچ گئی۔ (حالانکہ جھمپا کی کتب پڑھنے کی یہ ترتیب کچھ الٹ ہے لیکن پھر بھی۔) پھر ایک دن ایبی نے دریافت کیا کہ جھمپا باسٹن آرہی ہیں۔ صرف باسٹن ہی نہیں بلکہ ایم۔آئی۔ٹی آرہی ہیں۔ میں خوشی سے پھولے نہ سمایا۔ چٹ اپنی فرائڈے ٹائمز کی مدیرہ سے ڈینگیں مارنے لگا کہ جھمپا سے انٹرویو تو کہیں نہیں گیا۔ اس نے بھی نیا نیا کتابوں کا صفحہ شروع کیا تھا۔ بہت خوش ہوئی۔ اور میں جھمپا کے آنے کے دن گنتا گیا۔

پھر اچانک خبر آئی۔ جھمپا نے اپنا دورہ ملتوی کردیا ہے۔ ایک آدھ ہفتے بعد آئیں گی۔ اور اب ہارورڈ بک سٹور میں بولیں گی۔ ایک آدھ ہفتہ بھی گزر گیا۔ جھمپا کا کوئی نام ونشان نہیں۔ میں بیچین، مدیرہ کا موڈ خراب۔ بہرحال، جھمپا نہ آئیں۔ اور میری ان سے ملاقات نہ ہوئی۔ آج جب اِنٹَرپرٹَر آف مَیلاڈِیز پھر پڑھی تو اس ناہونے والی ملاقات کی یاد آئی۔ جھمپا، اگر آپ (1) اردو پڑھنا جانتی ہیں، (2) اس بلاگ سے واقف ہیں، اور (3) ایک جنونی مداح کو انٹرویو دینے پر کوئی اعتراض نہیں رکھتیں، تو فورا مجھے ای۔میل کریں۔

دا میٹرکس

2005-03-11T21:01:00.000-05:00

میں کراچی میں پلا بڑھا ہوں۔ کھانے پینے کے شہر میں۔ اور ہمارے یہاں سبزیوں کا شمار کھانے پینے میں نہیں ہوتا۔ سیدھی سی بات ہے، کراچی والے گوشت خور ہیں۔ جس شہر میں بیس طرح کے کباب ملیں وہ سبزی خوروں کو بیوقوف سمجھے گا۔ لیکن کیا کسی حساس جاندار کی جان لے کر پیٹ بھرنا ٹھیک ہے؟ کوئی بھی سوچنے سمجھنے والا اور اصول پرست انسان اس سوال کا جواب اچھی طرح جانتا ہے۔

سوچ تو میں رکھتا ہوں۔ لیکن اصولوں پر عمل اکثر نہیں کر پاتا۔ عام اسطلاح میں مجھے منافق کہتے ہیں۔ پلیٹ پر رکھا ہوا گوشت کا ٹکڑا کسی جیتی جاگتی مخلوق سے اتنا دور ہوتا ہے کہ کھانے والے کو خیال ہی نہیں آتا کہ وہ غلط کام کررہا ہے۔ کسی جاندار کی لاش سے خوشی نچوڑ رہا ہے۔ کسی حساس جاندار کی، جو شاید خود کچھ سوچ رکھتا تھا، درد، تکلیف، خوشی محسوس کرسکتا تھا۔

سبزی خوری کے مخالف اپنے نظریے کی چند گھسی پٹی دلیلیں پیش کرتے ہیں۔ مثلا۔

گوشت نہ کھانا صحت کے لیے مضر ہے۔ حقیقت اس کے بالکل برعکس ہے، یعنی گوشت کھانا صحت کے لیے نقصاندہ ہے۔ ویسے بھی، کیا وہ ہندو اور جین وغیرہ جو صرف سبزیاں کھاتے ہیں جسمانی طور پر کمزور ہوتے ہیں؟
اگر ہم گوشت نہ کھائیں تو جانوروں کی تعداد بےتحاشہ بڑھ جائے گی۔ بالکل فضول۔ جو جانور ہم کھاتے ہیں وہ کوئی جنگلوں سے نہیں آتے، بلکہ صرف ہمارے کھانے کے لیے پالے جاتے ہیں۔
جانور ناعقل ہیں، اسلیے کھانے کے قابل ہیں۔ نہایت تکبّر کی بات ہے۔ انسان خود ایک جانور ہے۔ اگر کل کو کسی دوسرے سیّارے سےکوئی ترقّی یافتی مخلوق زمین پر آکر انسانیت کو کھانے سے پہلے یہی دلیل پیش کرے تو ہمیں کیسا لگے؟

کوٹزی کی تصنیف الیزابتھ کوسٹیلو پڑھ کر مجھے اپنی گوشت خوری سے بڑی گھن آئی تھی۔ لیکن انسان عادت کا کمزور غلام ہے۔ میری گوشت خوری اب مرغی تک محدود ہے۔ اور مہینے میں ایک برگر تک۔

اب ملاحزہ کیجیے، اس تحریر کے عنوان کو مطلب۔ دا میٹرکس۔

ناکام انٹرنیٹ تلاش

2005-03-09T21:26:00.000-05:00

مجھے پتہ نہیں تھا کہ لوگ اردو میں بھی سرچ انجنز کا استعمال کرتے ہیں۔ لیکن یہ میری ہی نادانی تھی۔ جیسے جیسے اردو کا انٹرنیٹ پر استعمال بڑھتا جارہا ہے، ظاہر ہے کہ لوگ گوگل اور یاہو وغیرہ کا استعمال بھی اردو میں کر رہے ہیں۔ اس بلاگ پر جن الفاظ کی تلاش میں لوگ پہنچتے ہیں، وہ یہ ہیں:

سیکس: افسوس کہ یہاں جنسی نوعیت کے مواد کے بجائے پروفیسر سیکس کے صفحے کی کڑی ہے۔
اردو قران: میں اور قران؟ پڑھنے والے شاید یہاں مزاح کا پہلو دیکھ پائیں۔
کیری: سینیٹر کیری کے جلسے کا ذکر ان کے مداحوں کو اس بلاگ تک لےآتا ہے۔
مولوی: بھیّا کی بِنامولوی شادی کا قصّہ۔

دی ایل ورڈ

2005-03-09T18:34:00.000-05:00

بِٹ ٹورنٹ اور ازیوریس کی عنایت سے میں آجکل دی ایل ورڈ کا پہلا سیزن گھر بیٹھے دیکھ رہا ہوں۔ کمال کا ڈرامہ سیریل ہے۔ اتنے سارے مضبوط زنانہ کردار ٹیلیویژن پر دیکھنے کو کم ہی ملتے ہیں۔ اس ڈرامہ میں سب کچھ ہے: جزبات، ہنسی مزاق، عشق و محبّت، اور ظاہر ہے، امریکہ جدید میں ایک ہم جنسی عورت ہونے کے مسائل پر سنجیدہ تبصرہ۔ دنیا کا نقشہ اتنا مکمل ہے کہ دیکھنے والے کو مردوں کی غیرحاضری محسوس ہی نہیں ہوتی۔ تیسرے درجے کے سطحی پروگراموں (جس میں امریکی ٹیلیویژن کی تقریبا تمام پیداوار شامل ہے) کے مقابلے میں دی ایل ورڈ ہمارے زمانے کا شاہکار ہے۔

عامر ماموں کی نظم

2005-02-28T21:01:00.000-05:00

بہت سالوں پہلے عامر ماموں بحری جہازوں پر کام کیا کرتے تھے۔ جہازی کی زندگی چھوڑے ہوئے ایک مدّت ہوگئی لیکن سمندر سے ان کا عشق برقرار ہے۔ بدقسمتی سے بیچارے لاہور میں رہتے ہیں، لہروں اور نمک کی مہک سے دور۔ جب کبھی کراچی آنا ہوتا ہے تو سمندر کے دیدار کے لیے بیچین رہتے ہیں۔ وہ علیحدہ بات ہے کہ سی ویو کی حالتِ زار دیکھ کر سمندری عشق کچھ غیر معقول معلوم ہوتا ہے۔

موصوف کا شاعری کا پرانا شوق ہے۔ (بلکہ ناصر کاظمی کا یہ شعر بھی میں نے انہی سے سیکھا تھا۔) سمندر کو دیکھ کر فورا جان میزفیلڈ کی نظم "سی فیور" ادا کرتے ہیں۔ جس پر میں اور بھیّا ان کا خوب مزاق اڑاتے ہیں۔ ایک پھیکا سا ترجمہ پیش ہے۔

میں سمندروں کو لوٹوں گا، تنہا سمندر اور آسماں کو،
اور میں مانگتا ہوں بس ایک اونچا جہاز اور چلنے کے گرد ایک تارا،
اور پہیّے کی ٹھوکر اور ہوا کا گیت اور لہراتے ہوئے سفید بادبان،
اور سمندر کے چہرے پر سرمئی دھند اور پھوٹتی ہوئی سرمئی صبح۔

میں سندروں کو لوٹوں گا، کیونکہ بہتی لہروں کی پکار،
وحشی اور صاف پکار ہے جو جھٹلائی نہیں جاسکتی،
اور میں مانگتا ہوں بس ایک آندھی کا دن اور اڑتے ہوئے بادل،
اور پھکی ہوئی پھوار اور اڑتا ہوا جھاگ اور بگلوں کی چیخ وپکار۔

میں سمندروں کو لوٹوں گا، اس خانہ بدوش زندگی کو،
اس بگلے اور مچھلی کی راہ کو، جہاں ہوا تیز چھری کی مانند ہے،
اور میں مانگتا ہوں بس ایک زندہ دل قصّہ کسی ہنس منکھ ہمسفر سے،
اور ایک خاموش نیند اور میٹھا خواب جب لمبا سفر ختم ہو۔

نمبر چار

2005-02-25T22:09:00.000-05:00

مجھے آج پتا چلا کہ میرے عزیز دوست اسد کا ایرڈوش نمبر چار ہے۔ اسد نے ہی کے ساتھ ایک پرچا لکھا ہے۔ ہی نے ڈوناگی کے ساتھ، ڈوناگی نے ہرزوگ کے ساتھ، اور ہرزوگ نے ایرڈوش بقلم خود کے ساتھ ایک پرچہ شائع کیا ہے۔ تفصیلات یہاں اور یہاں دستیاب ہیں۔

ویسے اسد کا جس شعبے سے تعلق ہے وہاں وٹن نمبر کا زیادہ زور ہے۔ ایڈ وٹن ہمارے زمانے کے ذہین ترین انسان ہیں۔ دوسرے سوپرسٹرنگ انقلاب کے بانی ہونا کا سحرا ان کے سر ہے۔ ویسے تو ڈوناگی کے راستے اسد کا وٹن نمبر تین بنتا ہے۔ لیکن عین ممکن ہے کہ اس سے بھی چھوٹا کوئی راستہ ہو۔ سٹرنگ تھیوری کا فرقہ اتنا محدود ہے (اور اسد اس قدر قابل) کہ دو کا وٹن نمبر تو کہیں نہیں گیا!

کَیوِن بَیکَن، ایرڈوش اور گرڈل

2005-02-22T20:53:00.000-05:00

سِکس ڈگریز آف کَیوِن بَیکَن ایک مشہور کھیل ہے جو جالوں کی طاقت کا مظاہرہ کرتا ہے۔ کھیل کی بنیاد اس غیرالہامی حقیققت میں ہے کہ کسی بھی (امریکی) اداکر کَیوِن بَیکَن سے چھے یا کم اداکاروں کے فاصلے پر ہے۔ یعنی اس اداکار نے کسی اور اداکار کے ساتھ کام کیا ہے، اس اداکار نے بھی کسی اور اداکار کے ساتھ کام کیا ہے وغیرہ۔ بالاخر کسی اداکار نے کیون بیکن کے ساتھ کام کیا ہے۔ ہمارے اداکار اور کیون بیکن کے درمیان اداکاروں کی تعداد اس کا بیکن نمبر کہلاتی ہے۔

اس حقیقت کا ثبوت سمجھنے کے لیے تھوڑی بہت گراف تھیوری کی ضرورت ہے۔ ریاضی کی دنیا میں اس کا متبادل ایرڈوش نمبر ہے۔ پال ایرڈوش ایک مشہور ریاضی دان تھے۔ ان کے چھپے ہوئے پرچوں کی تعداد اس قدر کثیر ہے کہ تقریبا ہر ریاضی دان (اور اکثر دوسرے سائینسدانوں) کا ایرڈوش نمبر آٹھ سے کم ہے۔ (ایک ایڑڈوش نمبر ہونے کی شرط ہے کہ آپ نے ایرڈوش کے ساتھ کوئی پرچہ لکھا ہو۔)

آج میں اس ماہ کے نیویارکر میں آینسٹاین اور گرڈل کے متعلق ایک مضمون پڑھ رہا تھا کہ اچانک ایرڈوش نمبرز کا خیال آیا۔ معمولی لوگ غیرمعموولی لوگوں سے بہانے بہانے سے ملاپ ڈھونڈتے ہیں! تو میں نے کرٹ گرڈل سے یہ رشتہ نکالا۔ میں نے پروفیسر سیکس سے لاجک اور رکرژن تھیوری سیکھی۔ پروفیسر سیکس پال کوہن کے گریڈ طالب علم تھے۔ کوہن اور گرڈل لاجک کی دنیا میں ہم عصر تھے۔ (بلکہ پروفیسر سیکس بھی گرڈل سے ملے ہوئے ہیں۔) تو لیجے جناب، اس ناچیز کا گرڈل جیسے خدا سے ایک کمزور سا رشتہ نکل آیا۔

ناصر کاظمی

2005-02-16T22:57:00.000-05:00

دل تو اپنا اداس ہے ناصر
شہر کیوں سائیں سائیں کرتا ہے؟

میٹروپلس کا گمنام سلون

2005-02-13T19:09:00.000-05:00

دا ڈارک نائٹ رٹرنز سے اقتباس اور ترجمہ۔
(مصنّف مستقبل میں ایک سلون کا نقشہ بیان کررہے ہیں جہاں مختلف سوپرہیروز جمع ہوکر گزرے ہوئے ماضی کو یاد کرتے ہیں۔)

بارٹینڈر کو دیکھ کر آپ کو پہلا اشارہ ملتا ہے کہ اس جگہ میں کچھ ٹھیک نہیں ہے۔ آپ اس کا چہرہ کبھی نہیں بھلا پائیں گے۔ وہ ایک ایسے آدمی کا چھلکا ہے جو بہت کچھ دیکھ چکا ہے۔ ایک ٹوٹا ہوا انسان جس کی آنکھیں سرخ لیزر کی ہیں۔ اس کا ماتھا عجیب ہے جیسے کہ کوئی برفانی تودہ کبھی بھی گرنے والا ہو۔ اس کی جلد سلیٹی پڑ چکی ہے۔
اس کی آواز ایسی ہے کہ گویا کوک کی بوتلیں ایک دروازے کے نیچے پس رہی ہوں۔
اس کا نام جونز ہے۔
وہ کہتا ہے کہ وہ مریخ سے ہے۔
اور اس سے کوئی نہیں کہتا کہ وہ پاگل ہے، بار کا ایک اداس گاہک بھی نہیں۔ یہ بات ہرگز نہیں ہے کہ وہ اس سے ڈرتے ہیں۔
سب نے ایسے کام دیکھے اور کرے ہیں جو ناممکن سمجھے جاتے ہیں۔
یہ اس طرح کے لوگ نہیں ہیں جو گاڑیاں اٹھانے یا گولی کی رفتار سے تیز بھاگنے یا ہوا میں اڑنے کے بارے میں ڈینگیں ماریں۔ نہیں، یہ اس طرح کے لوگ نہیں[۔۔۔]

وہ حیرت انگیز کارناموں کی باتیں کرتے ہیں۔ ایک سٹیل کے انسان کی باتیں۔ اور ایک ایمیزون شہزادی کی۔
مگر وہ کبھی اس ظالم کا ذکر نہیں کرتے۔ وہ جو نہ اڑ سکتا تھا اور نہ اپنے ہاتھوں سے سٹیل موڑ سکتا تھا۔ وہ جو سب کو خوف ذدہ کردیتا اور ہماری بزدلی پر ہنستا تھا۔ نہیں، وہ کبھی اس کا ذکر نہیں کرتے۔

ان میں سے کوئی بھی بیٹ مین کے بارے میں سننا نہیں چاہتا۔
کیا وہ خاموشی سے مار دیا گیا تھا؟ یا کیا اس نے فیصلہ کیا کہ ہم اس کے لائق نہیں؟
یہ سوال ایک لمہے کو کھڑا ہوتا ہے اور پھر جونز سب کے لیے ایک اور گلاس کا بندوبست کرتا ہے۔

وہ پھر باتیں کرنے لگتے ہیں۔ پرانے دنوں کی۔ عظیم دنوں کی۔
وہ یاد کرتے ہیں۔
وہ حالات کے بیچوں بیچ تھے۔
پہلے۔
اتنا عرصہ نہیں گزرا۔
جب ہیرو ہوا کرتے تھے۔

بیٹ مین بگنز

2005-02-09T20:51:00.000-05:00

چند دنوں پہلے میں نے آنی والی فلم بیٹ مین بگنز کا ٹریلر دیکھا۔ اس بلاگ کو پڑھنے والے میرے بیٹ مین کے جنون سے بخوبی واقف ہوں گے۔ پچھلی چند بیٹ مین فلموں کا تجربہ اتنا اچّھا نہیں رہا اس لیے نئی فلم سے میری توقعات کوئی خاص نہیں۔ لیکن دو باتیں مثبت ہیں۔

جوئیل شوماکر جیسے گھٹیا ڈائرکٹر کی چھٹّی کر دی گئی ہے۔ ویسے تو یہ بہت پہلے ہوجانا چاہیے تھا۔ کمال ہے، اس شخص نے بیٹ مین جیسی مضبوط فرینچائز کو تباہ کر کے رکھ دیا۔ نئے ڈائریکٹر کِرس نولن ہوں گے۔ جن کی مشہور ممنٹو فلمسازی کا شاہکار ہے۔
ویل کلمر اور جارج کلونی جیسے غیر یقینی بیٹ مینوں کے بعد ایک نیا چہرا بروس وین کا کردار ادا کرے گا: کرسچن بیل، جو ایسا جانا پہچانا نام نہیں۔ مائیکل کیٹن جیسا کام تو شاید نہ کر پائیں لیکن ان سے پھر بھی اچّھی کارکردگی کی توقع ہے۔

اگر مجھ سے پوچھا جاتا تو میں وارنر برادرز کے اہلکاروں کو مشورہ دیتا کہ فرینک ملر کو اس فلم میں شامل کریں۔ ان کی بیٹ مین: ائیر ون کا مرکزی خیال بھی بیٹ مین بگنز سے ملتا جلتا ہے۔ یا پھر ٹاڈ مکفارلین۔ حالانکہ سپان کی فلمبندی اتنی خاص نہیں تھی، لیکن پھر بھی کوئی ایسا فنکار جس کا تعلق ڈی۔سی کامکس کی دنیا سے رہا ہو۔

شاید ایک کمرشل فلم سے اتنی امّیدیں وابستہ کرنا فضول ہے۔ اسٹودیو صرف پیسے کی زبان سمجھتے ہیں۔ ان کے نزدیک فن کی کیا قدر؟

کیسٹ کہانی

2005-02-09T19:25:00.000-05:00

جب میں چھوٹا تھا تو ای۔ایم۔آئی نے آڈیو کیسٹوں پر بچّوں کی کہانیوں کا سلسلہ شروع کیا تھا۔ اب جبکہ ٹیپ پر کتابیں عام ہیں تو یہ کوئی انوکھی بات نہیں لگتی۔ لیکن اس زمانے میں تو بہت انہونی بات تھی۔ ٹی۔وی کے مشہور اداکار ان کہانیوں میں اپنی آواز کا جادو جگاتے تھے۔ کہانیاں بھی دنیا بھر کی مقبول ترین تھیں۔ الف لیلی (یعنی سندباد، علی بابا وغیرہ) سے لے کر جیک اینڈ دا بین سٹاک اور سنڈریلا تک۔ اب شاید لوگ یہ پڑھ کر ہنسیں لیکن مجھے تو تمام کی تمام بہت پسند تھیں۔

حال ہی میں میں نے میوزک پاکستان نامی ایک سائٹ دریافت کی ہے جہاں اکثر کیسٹ کہانیاں دستیاب ہیں۔ کل ہی میں سندباد جہازی کے پہلے سفر سے لطف اندوز ہوا ہوں۔

ایک اور بات۔ کہانیوں کے درمیان، شاید خالی جگہ پر کرنے کے لیے، کیسٹ پر بچّوں کے لیے گانے بھی ہوتے تھے۔ ایک گانا میری یادداشت میں ایسا بسا ہوا ہے جیسے کل ہی میرے کانوں پر پڑا ہو۔ گانے کا نام تھا "اکّڑ بکّڑ"۔ یہ دو گینڈوں کی کہانی تھی جو ایک دن چڑیا گھر سے بھاگ کر شہر میں مزے اڑاتے پھرتے ہیں۔ شروع کا حصّہ تو مجھے یاد نہیں لیکن درمیان کے بند کچھ اس طرح تھے۔ (گینڈے ایک ریسٹورنٹ سے کھاپی چکے ہیں لیکن جیب میں ایک کوڑی نہیں ہے!)

بیرا لے کر بِل جو آیا
دونوں گینڈوں نے غش کھایا
حلوائی بیرے سے بولا
کاٹ کے ان کے تم رکھ لو

اکّڑ بکّڑ، بم بم بم بم، بم بے بو

ہانپتے کانپتے وہاں سے بھاگے
مال روڈ سے تھوڑا آگے
سنیما دیکھ کے گینڈے بولے
کیوں نہ دیکھیں آخری شو

اکّڑ بکّڑ، بم بم بم بم، بم بے بو

ٹکٹوں پر جو ہوئی لڑائی
اتنی دیر میں پولیس بھی آئی
تھانیدار نے سزا سنائی
(اس سے آگے مجھے یاد نہیں)

چڑیا گھر میں رہتے ہیں
ہر دم گاتے رہتے ہیں

اکّڑ بکّڑ، بم بم بم بم، بم بے بو

یہ گانا کیسٹ کہانی نمبر تین میں ہے، سندباد کے سفر کے فورا بعد۔ میں نے میوزک پاکستان والوں کو ای۔میل بھیجی ہے کہ اگر آپ کے پاس کیسٹ موجود ہے تو مہربانی فرما کے اکّڑ بکّڑ کو بھی دنیا کے سامنے پیش کریں۔ اگر سننے والا چوکس ہو تو سندباد کے آخری دو سیکنڈوں میں اکّڑ بکّڑ کی ابتدا سن سکتا ہے۔

بیوٹِفل ڈے

2005-02-08T20:43:00.000-05:00

کل اتفاق سے ریڈیو پر یوٹو کا گانا "بیوٹِفل ڈے" سنا۔ عجیب سی کیفیت ہوگئی۔ آخری دفعہ جب میں نے یہ گانا سنا تھا تو 31 اکتوبر 2004 تھی اور مینچسٹر، نیوہیمپشَر میں تیس ہزار کا مجمع تھا۔ جان کیری جلسے سے خطاب کررہے تھے۔ لوگ "ٹو مور ڈیز" (دو دن اور) کے پرجوش نعرے لگا رہے تھے۔

میں کیری مہم کا ایک ادنی رضاکار تھا۔ اور ادنی رضاکار ہونے کی حیثیت سے میری ذمّہ داری خاصی معمولی تھی۔ یعنی ایک جنگلے پر کھڑے ہوکر دوسرے ادنی لوگوں کی ناکہ بندی کرنا۔ کمال کی بات ہے۔ ذرا سی طاقت انسان کا دماغ خراب کردیتی ہے۔ جنگلے کے ایک طرف میں اور دوسری طرف ایسے لوگ جو مجھ سے گفتگو وغیرہ کرکے دوسری طرف (یعنی کیری کے قریب) آنا چاہ رہے تھے۔ پولیس والے اور دیگر اعلی اہلکار مجھے وقتا فوقتا ہدایات دے رہے تھے۔ کیا شان تھی!

بعد میں کیری صاحب سے ہاتھ ملانے کا موقع ملا۔ ہاتھ تو خیر کیا، ایک انگوٹھا اور دو انگلیاں تھیں۔ پورا ہاتھ تو ایبی کو نصیب ہوا۔ الیکشن سے چند ماہ پہلے میں کیری صاحب کا کوئی خاص مداح نہ تھا۔ لیکن وقت کے ساتھ ساتھ وہ بہتر لگنے لگے۔ اور اس دن تو ایسا سحرکن ماحول تھا کہ ہر انسان کو یقین تھا کہ دو دنوں میں یہ شخص صدارتی انتخاب جیت جائے گا۔

دو دن گزر گئے اور وہ شام ایک خواب سا لگنے لگی۔ اب صرف یوٹو اور بیوٹفل ڈے کی حسین یاد باقی ہے۔

انسان اور انسانیت

2005-02-04T19:11:00.000-05:00

ووڈرو وِلسَن کے بارے میں کہا جاتا تھا کہ انہیں انسانیت سے محبّت تھی مگر انسانوں سے نفرت۔ جب کبھی اپنے اوپر تنقیدی نگاہ ڈالتا ہوں تو صدر وِلسَن سے ملتی جلتی ذہنیت پاتا ہوں۔ انسانیت میں میرا پختہ یقین ہے۔ برادری، خلوص، ہمدردی، اخلاق: یعنی دیگر جزبات و خیالات جنہیں انگریزی میں سالیڈَیرِٹی کہتے ہیں (جس کے اردو میں لغوی معنی اتحاد ہیں لیکن اصل مطلب اتحاد سے کہیں گہرا ہے) میرے لیے بہت اہمیت رکھتے ہیں۔

ٹھیک ہے کہ دنیا کا حال کچھ اتنا اچھا نہیں۔ جنگ، غربت، ناانصافی، ظلم و تشدّد ہر طرف نظر آتے ہیں۔ لیکن دنیا اور انسانیت بہتری کی طرف رواں ہے۔ سیدھی سی بات ہے۔ زمانہِ قدیم میں چنگیز خان جیسے نفیس لوگ لاکھوں کڑوڑوں کا قتل کرکے میٹھی نیند سویا کرتے تھے۔ تیس چالیس سال پہلے امریکہ نے انڈو چائینا میں لاتعداد لوگ مار ڈالے۔ لیکن عوام کے غصّے نے خون کی ہولی کو قائم نہ رہنے دیا۔ پاکستانی فوج نے جو مشرقی پاکستان پر ظلم ڈھائے وہ آج بلوچستان میں نہیں دہرائے جاسکتے۔ بڑی سی بڑی طاقت بھی آج ظلم و تشدّد کا استعمال کرنے سے پہلے بہانے تلاش کرتی ہے (جیسا کہ عراق میں دیکھا جارہا ہے)۔ سیدھی سی بات ہے، حلاکو خان کو بغداد کی اینٹیں بجانے کے لیے "وسیع پیمانے پر تباہی پھیلانے والے ہتھیاروں" کے بہانے کی ضرورت پیش نہیں آئی تھی۔ کیا یہی انسانیت کی ترقّی کی دلیل نہیں؟

یہ تو تھی بات انسانیت سے محبّت کی۔ اب چلتے ہیں انسانوں سے نفرت کی طرف۔ نفرت تو بہت وزنی لفظ ہے، میرا رویّہ ناپسندیدگی یا کترانے تک جاتا ہے۔ دنیا کی کون سی خامی ہے جو عام انسان میں موجود نہیں؟ (ظاہر ہے میں خود بھی عام انسانوں میں شامل ہوں۔) تنگ ذہنی، تعصب، خود غرضی: یعنی ایسی تمام خصوصیات جو سالیڈَیرِٹی کے مخالف ہیں۔ میں یہاں کسی بڑی بدی کی نہیں بلکہ عام لوگوں کی عام سی برائیوں کی بات کررہا ہوں۔ ہٹلر کے بارے میں تو لاتعداد کتابیں لکھی جاچکی ہیں۔ ہٹلر تو مرگیا۔ لیکن ان تھکا دینے والی، سخت بور کرنے والی معمولی برائیوں کا کیا کیا جائے جو ہر طرف پھیلی ہوئی ہیں؟

تعصب

2005-02-01T20:07:00.000-05:00

ہمارے معاشرے میں تعصب جس بری طرح سے پھیلا ہوا ہے، کسی حد تک مجھے اس کا اندازہ تھا۔ لیکن مجھے یہ غلط فہمی بھی تھی کہ مہزّب لوگ اپنے تعصبات کی نمائش اپنی ذاتی زندگی میں کرتے ہیں، اجنبیوں کے سامنے نہیں۔ بھیّا کے ولیمے کے روز جو واقعہ پیش آیا وہ اس مناسبت سے قابلِ ذکر ہے۔

میں بھیّا کے سسرابّا (یعنی بھابھی جان کے والد صاحب) سے گفتگو کررہا تھا۔ نہایت نفیس انسان معلوم ہوتے تھے۔ پرانے وقتوں میں میرٹھ میں مقیم تھے۔ جانے میں نے کیا موضوع چھیڑا کہ صاحب فرمانے لگے۔ میاں، میں نے تو اپنے بچّوں کے لیے شادی کے حوالے سے تین ہی شرائط رکھی تھیں۔ "نان مسلم" نہ ہو، شیعہ نہ ہو، اور پنجابی نہ ہو۔

ایسی بزرگ شخصیت کے منہ سے یہ الفاظ سن کر میں کچھ کھسیانہ سا ہوگیا۔ سمجھ میں نہیں آیا کہ حضرت کو کیسے بتاؤں کہ میری ہونے والی ہمسفر غیرمسلم ہے، میرا بہترین دوست شیعہ ہے، اور میرے دیگر دوستوں کا تعلق پنجاب سے ہے۔ اسی وقت ایک بیرا سوپ لے آیا اور خوش قسمتی سے گفتگو اختتام پزیر ہوئی۔

جیسا کہ میں نے کہا، مجھے ان بزرگ کے تعصب پر حیرت نہیں ہوئی۔ تعصب کرنا تو ہمارا قومی مشغلا ہے۔ تعجّب اس بات پر ہے کہ انہوں نے ایک بالکل انجان شخص کو بیٹھے بیٹھے ایسی باتیں کہ ڈالیں جو تہزیبب اور آدابِ گفتگو کے سخت خلاف ہیں۔ کیا معاشرہ اس پستی تک جاپہنچا ہے کہ ہم ذہن کی گندگی کو چھپانے کے بجائے اسے بھری محفل میں اچھالتے پھرتے ہیں؟

کارپوریٹ امریکہ کی سنگدلی

2005-01-25T19:24:00.000-05:00

آج بڑا افسوسناک دن تھا۔ حال ہی میں آریکل کارپوریشن (جہاں میں ملازم ہوں) نے مخالف کمپنی پیپل سافٹ کو خرید لیا تھا۔ کچھ عرصے سے افواہیں گرم تھیں کہ اکثر ملازمین کو نوکری سے نکال دیا جائے گا تاکہ کاغذ پر یہ سودا منافع بخش لگے۔ پیپل سافٹ کے ملازمین کی تو پچھے ہفتے ہی چھٹّی کردی گئی تھی۔ آج ہماری باری تھی۔

میری ایک ساتھی ملازم تھیں۔ خاصی عمر کی ہوں گی۔ ان کو نکال دیا گیا۔ بیچاری کی بوڑھی والدہ ہیں جو خاصی بیمار رہتی ہیں۔ کام کے ذریعے جو طبّی انشورنس ملتی ہے وہ آج رات ختم ہو جائے گی۔ معیشت کا حال اتنا اچھّا نہیں کہ دوسری نوکری فورا مل جائے۔ بیچاری سخت پریشان تھیں۔ الوداع کہتے ہوئی ان کی آنکھوں میں آنسو آگئے۔ مجھے گلے لگایا۔ پیار کیا۔ کہنے لگیں تم بہت اچھّے لڑکے ہو۔ اپنا خیال رکھنا۔ دیکھنے والوں کے دل ٹوٹ گئے۔

ایسی ترقّی یافتگی کا کیا فائدہ جس کی بنیاد مزدور کی ناخوشی اور مخدوشی ہو؟ یورپ اور ہندوستان میں بھی لوگوں کو نکالا گیا لیکن وہاں کے لیبر قوانین اس نوعیت کے ہیں کہ بڑی سے بڑی کمپنی بھی یک مشت اتنے سارے ملازمین کو فارغ نہیں کرسکتی۔ یہ امریکہ میں ہی مزدور یونیینز اور لیبر قوانین کی کمزوری کی دلیل ہے کہ بغیر کوئی وجہ پیش کیے ملازم کو سڑک پر پھینک دیا جاتا ہے۔ سنگدل کارپوریٹ امریکہ کے لیے منافع انسانی خوشی سے بالاتر ہے۔

بلامزہب نکاح

2005-01-24T19:48:00.000-05:00

شادی کی تقریب میں ایک جزوی کامیابی حاصل ہوئی۔ جیسا میں پہلے لکھ چکا ہوں، میری اور بھیّا کی یہ خواہش تھی کہ شادی کے تمام مراحل میں مزہب کا کوئی کردار نہ ہو۔ اور واقعی ایسا ہی ہوا۔ نکاح عامر ماموں نے پڑھوایا کسی اجنبی داڑھی والے نے نہیں، اور اس خوبی سے پڑھوایا کہ خدا یا اسلام کا کوئی ذکر نہیں ہوا۔ پہلے گواہوں نے نکاح نامے پر دستخت کیے۔ (دو گواہ تھے: میں اور بھابھی کے بھائی) پھر ماموں نے بھابھی اور بھیّا سے تین دفعہ پوچھا کہ کیا ان کو نکاح قبول ہے۔ دونوں کی طرف سے تین مرتبہ حامی ملنے کے بعد انہوں نے کہا مبارک ہو، اور نکاح مکمل ہو گیا۔


بھیّا اور بھابھی نکاح نامے پر دستخت کرتے ہوئے

اس کے بعد معاملے میں کھٹاس پڑگئی۔ ماموں اور بھابھی کے والد کی ملی بھگت سے ایک مختصر سی دعا پڑھی گئی جس میں وہی روایتی بکواس تھی۔ یا اللہ، یا مالک العالمین، اس جوڑے کو سلامت رکھ وغیرہ وغیرہ۔ ایک بہترین لادین رسم پر سخت پانی پھرگیا۔ نہایت کوفت ہوئی۔ تمام شادی کی تصویریں لینے کی ذمہ داری میں نے خود ہی اٹھائی ہوئی تھی۔ احتجاجا میں نے دعا کی کوئی تصویر نہیں لی۔ نہ ہی ہاتھ اٹھائے۔ اب اسے بچکانگی کہیں یا بیوقوفی، ہر انسان کو اپنے خیالات کا اختیار ہے۔

لادینی گواہ

اس کے بعد ایک اور مزہبی موقع آیا۔ رات کو رخصتی کے وقت ایک آواز اٹھی کے قران لائیے، لڑکی اس کے نیچے سے گزرے گی۔ ہم منہ کھولے دیکھتے ہی رہ گئے۔ کچھ تاخیر کے بعد ایک بوسیدہ سا قران دستیاب ہوا اور "لڑکی" اس کے نیچے سے گزری۔ میں نے دوبارہ احتجاجا تصویر نہ کھینچی۔ اس آبرو کے ساتھ کے شاید تصویری تاریخ کی طاقت ماضی کی حقیقت کو بدل ڈالے۔

واپسی

2005-01-24T19:38:00.000-05:00

تین ہفتوں کے بعد میں باسٹن واپس پہنچ گیا ہوں۔ جمعہ کے روز واپسی ہوئی اور ہفتے اور اتوار کو شمال مشرقی امریکہ شدید برفانی طوفان کی لپیٹ میں آگیا۔ گھر سے نکلنا تقریبا ناممکن تھا۔ دو فٹ سے ذائد برف پڑی۔ یہ تو خوش قسمتی ہے کہ پرواز صحیح دن پہنچ گئی کیونکہ اتوار کو تو حوائی اڈّہ بھی بند تھا۔

بہت دنوں سے بلاگ نہیں کرپایا۔ بھیّا کی شادی تھی۔ جس کمرے میں والد صاحب کا کمپیوٹر ہے اس میں دو عدد خالائیں مقیم تھیں۔ ان سے کہنا اچّھا نہیں لگا کہ آپ آرام سے سوتی رہیں، میں ذرا ای۔میل اور بلاگ وغیرہ پر ایک نظر ڈال لوں۔ بہرحال، کراچی میں تین ہفتوں اور روایتی شادی سے متعلق اپنے مشاہدات کو رفتہ رفتہ لکھتا چلا جاؤں گا۔ پڑھنے والے ہوشیار ہو جائیں!

فرائڈے ٹائمز

2005-01-08T13:09:00.000-05:00

اس ہفتے کے فرائڈے ٹائمز میں بلاگنگ سے متعلق ایک مضمون لکھا ہے۔ خیر لکھا تو کافی پہلے تھا، چھپا اب ہے۔ مضمون میں دیگر اردو بلاگز کا بھی ذکر ہے۔ افسوس کہ جب مضمون لکھا تھا تو کنول کے پھول کا وجود میرے علم میں نہ تھا، اسلیے اس کا ذکر نہیں ہے۔

دین اور دنیا

2005-01-06T06:34:00.000-05:00

چند دنوں پہلے ایک زیور فروش کےہاں جانے کا اتّفاق ہوا۔ موصوف پر دین کا جوش بری طرح چھایا ہوا تھا۔ لمبی داڑھی، شرعی پاجامہ، سر پر ٹوپی، ماتھے پر تقوی کا نشان وغیرہ۔ اچھی عمر کے صاحب تھے اور خاندانی کاروبار لگتا تھا۔ ان کے کئی عدد بیٹے بھی دوکان میں ملازم تھے۔ دو باتوں نے حیران کیا۔

اوّل تو صاحب میری والدہ سے اس طرح کترا رہے تھے کہ جیسے کوئی دس سالہ بچّہ لڑکیوں سے شرماتا ہو گا (ویسے پتا نہیں کہ دس سالہ بچّے لڑکیوں سے شرماتے بھی ہیں یا نہیں)۔ آنکھیں ملانا تو دور کی بات، بڑے میاں تو بات بھی کچھ منہ ہی منہ میں کر رہے تھے اور الفاظ کے استعمال میں بھی کنجوسی نمایاں تھی۔

یکایک دوکان کے ملازمین نے بھیڑ لگانی شروع کردی۔ بڑے میاں نے اعلان کیا کہ نماز کا وقت ہو گیا ہے اسلیے ہمیں انتظار کرنا پڑے گا، حالانکہ انہوں نے ہمیں وقت دے کر بلایا تھا۔ کوئی خاص ندامت کا مظاہرہ بھی نہیں کیا۔ لو بھئی لو، ایک صاحب نے وہیں اذان دی اور سب کے سب نماز پڑھنے لگے۔ گھبرا کر امّی اور سحر نے جلدی سے سر ڈھکے۔ اور میں نے ہنسی روکنے کی سر توڑ کوشش کی۔ جماعت، سنّتوں اور طویل دعا کے نعد محترم نے ہمیں پھر عزّت بخشی اور گفتگو کا موقع دیا۔

دو خیال ذہن میں آئے۔ اگر مزہب کی روح کے مطابق ان صاحب کو خواتین سے میل جول کرنا پسند نہیں تو پھر زیورات کی دوکان کھولنے کا مشورہ انہیں کس حکیم نے دیا تھا؟ اور کیا اسلام بری کسٹمر سَروِس کا درس دیتا ہے؟ اگر نہیں تو پھر یہ کون سا طریقہ ہے کہ دوکاندار گاہک کو بلائے اور پھر عبادت میں لگ جائے؟ اور نادم ہونے کے بجائے اپنے آپ کو بالاتر محسوس کرے۔ ظاہر ہے خدا کی سَروِس کسٹمر سَروِس سے زیادہ ضروری ہے!

سوپرمین کرِپٹَون میں

2005-01-06T06:31:00.000-05:00

کافی عرصے سے بلاگ نہیں کر پایا۔ کچھ روز سفر میں گزر گئے (جی ہاں، میں اب ایشیا کے پیرس کراچی میں ہوں!) اور کچھ وقفہ جیٹ لیگ کی نزر ہو گیا۔ اس کے بعد بخار کی باری تھی۔ ویسے تو ڈائل اپ کے ساتھ کاہلی مفت ملتی ہے۔ لیکن آج ہمّت کر کے بلاگ کی طرف نظر اٹھا ہی لی۔

پاکستان میں مقیم بلاگر بہنوں اور بھائیوں سے گستاخی کی معافی چاہتا ہوں لیکن یہاں اردو بلاگر کی موجودگی بالکل ایسی ہے کہ جیسے سوپرمین کرِپٹَون جا پہنچا ہو۔ یا پھر لؤس کی محبّت سے مجبور ہو کر اپنی تمام طاقتیں گوا چکا ہو (جیسا کہ سوپرمین ٹو میں دیکھا گیا)۔ گویا اس میں اور گردا گرد کے لوگوں میں کوئی فرق ہی نہ رہے۔

یو این

2004-12-22T21:00:00.000-05:00

بہت بڑی خوشخبری ہے۔ ایبی کو یو این میں نوکری مل گئی! پچھلے سال اس نے مقابلے کے امتحان میں حصّہ لیا تھا۔ ایک سال کے بعد جاکر کامیابی کی خبر ملی اور انٹرویو کے لیے نیو یارک کا بلاوا آیا۔ اس کے ڈیڑھ مہینے بعد آج ویب سائٹ پر نتائج کا اعلان ہوا۔ اتنے انتظار اور تحمّل کا عمدہ صلح ملا۔

سوال یہ کھڑا ہوتا ہے کہ اگر ایک تنظیم کو ملازمین کے چناؤ میں سال سے زیادہ کی مدّت درکار ہے تو وہ دنیا کے اہم مسائل حل کرنے میں کتنی موئثر ثابت ہوگی؟ یو این کو تو سنگین ترین حالات کا سامنا پڑتا ہے۔ قحت، جنگ، نسل کشی وغیرہ۔ امّید ہے کہ ایسی صورتوں میں تیزی سے کام ہوتا ہوگا۔

ظاہر ہے اتنے سخت مقابلے میں کامیابی حاصل کرنا کوئی عام بات نہیں۔ ہر سال امتحان میں پاس ہونے والوں کی تعداد صرف چند فیصد ہوتی ہے۔ میرا تو سر فخر سے آسمان سے باتیں کر رہا ہے۔ ایک عرصے سے ایبی کا الزام ہے کہ میں اس کے ذریعے اپنے خواب جی رہا ہوں۔ واقعی، مجھے یو این کے مقابلے کے امتحان میں بیٹھنے کا بہت شوق ہے۔ لیکن افسوس کہ پاکستانیوں کے لیے امتحان میں شرکت کئی سالوں سے بند ہے۔ تو اگر ایبی کی کامیابی سے میں بے پناہ مسرّت حاصل کر رہا ہوں تو کوئی ایسی بری بات نہیں۔

حقِ انتخاب

2004-12-20T20:53:00.000-05:00

ڈان اخبار والے ہر جمعہ کو مزہبی نوعیت کا ایک مضمون شائع کرتے ہیں۔ جانے کہاں کہاں سے چھانٹ کر جاہل اسلامی ماہرین لاتے ہیں۔ ایک سے بڑھ کر ایک ہوتا ہے۔ پچھلے جمعہ کے ماہر وہی تھکی ہاری دلیل پیش کر رہے تھے جس کے مطابق اسلام نے عورت کو تمام حقوق چودہ سو سال پہلے ہی دے دیے تھے۔ بھلا مغرب یا جدیدیت سے ہمیں کچھ سیکھنے کی کیا ضرورت؟ ہمیں ان کی فحشی، آزاد خیالی، نسوانی ہم جنسی وغیرہ نہیں چاہیے۔ اس قسم کی جہالت کا میں عادی ہوں اور اس کے خلاف اکثر ڈان کو خط لکھتا رہتا ہوں۔ لیکن اس مضمون میں خصوصا ایسی بات کا ذکر تھا جسے پڑھ کر میرا خون کھول اٹھا۔ اور وہ ہے عورت کا حقِ انتخاب۔

ظاہر ہے کہ اسلامی ماہر اس حق کے سخت خلاف ہیں۔ بلکہ امریکہ اور دیگر یورپی ممالک میں اس حق کی موجودگی کو مغرب کی فحشی کا حصّہ سمجھتے ہیں۔ ان سے اتنا نہ ہوا کہ اپنی تنگ ذہنی کا مظاہرہ کرنے سے پہلے کسی ایسی عورت سے گفتگو کر لیتے جسے اسقاطِ حمل کا تجربہ ہو۔ جانے اس کی کیا مجبوری ہوگی؟ اس کے کیا حالات ہوں گے؟ لیکن ظاہر ہے، مزہب تو مرد کی جائیداد ہے اور صرف مرد ہی اسے سمجھ سکتا ہے۔ کسی عورت سے رجوع کرنے کی کیا ضرورت، خواہ اس کی زندگی کا سوال ہی کیوں نہ ہو؟

ذرا دیکھیے، مزہب عورت کو کتنا "حق" دیتا ہے۔ زنا بالجبر کی صورت میں بھی اسے حق نہیں کہ حمل کو ختم کر سکے۔ اگر حمل سے عورت کی زندگی خطرے میں ہو تب بھی اسے مستقبل کی امکانی زندگی کے لیے اپنی زندگی قربان کرنا پڑے گی۔ اور اگر وہ ایسا نہ کرے تو مزہب اور اسلامی زمانہ اسے مجرم قرار دیتا ہے۔

سیدھی سی بات ہے۔ عورت کا جسم، عورت کی مرضی۔ قاضی اور خدا دونوں کو عورت کے جسم پر کوئی حق نہیں۔ اور یہ فقرہ "اسقاطِ حمل" سراسر جزباتی ہے۔ ترقّی پسند لوگوں کو چاہیے کہ "حقِ انتخاب" کو اپنائیں۔

پچھلی اپریل ایبی اور میں واشنگٹن میں ہونے والے حقِ انتخاب کے مظاہرے میں شریک ہوئے۔ دس لاکھ کا مجمع تھا۔ میں نے تو اپنی زندگی میں اتنے سارے لوگ ایک جگہ اکٹھے کبھی نہیں دیکھے تھے۔ اتّحاد کا ایسا منظر تھا کہ آنکھوں میں آنسو آگئے۔ کاش انسانیت ہر نانصافی کے خلاف اسی طرح کھڑی ہو جائے۔

ارسلا کے لےگوئن کی ناراضگی

2004-12-18T19:04:00.000-05:00

لگتا ہے کہ ارتھسی منی سیریز صرف مجھے ہی زہر نہیں لگی۔ اس سلیٹ کے مضمون میں خود مصنّفہ خاصی ناراض ہیں۔

سالگرہ

2004-12-17T22:42:00.000-05:00

آج میری سالگرہ ہے۔ اٹھائیس سال کچھ زیادہ ہی عمر ہوتی ہے! خیر پھر بھی تیس سے کم ہے۔ میرے پاس کرنے کو کوئی گہری بات نہیں اسلیے اپنے تمام تحائف کی فہرست بنا رہا ہوں۔

* دا ڈارک نائٹ ریٹرنز۔ فرینک مِلر
* سپلنٹر سیل۔ پینڈورا ٹومورو
* پرنس آف پرژیا۔ واریر وِداِن
* لَو، پاورٹی اینڈ وار۔ کرسٹوفر ہچنز
* گفٹس۔ ارسلا کے لاگوئن
* میجک سِیڈز۔ وی ایس نیپال
* تھری ہنڈرڈ۔ فرینک مِلر
* سویٹر
* تین جوڑی موزے

اے بینڈ ان دا رور

2004-12-16T22:43:00.000-05:00

کیا قلم ہے نیپال کا! جادو ہے اس انسان کے ہر لفظ میں۔ پاکستان میں تو لوگوں کو ہر طرف اسلام دشمن سازشیں نظر آتی ہیں اسلیے اس عظیم قلم کی کوئی قدر نہیں۔ نوبیل انعام بھی ان کو اسی مغربی سازش کی وجہ سے دیا گیا تھا۔ افسوس کیونکہ "اے بینڈ ان دا رور" جیسے ناول کو ہر انگریزی ادب کے نصاب میں شامل ہونا چاہیے۔

میں افریقی نہیں۔ کبھی افریقہ نہیں گیا۔ لیکن نیپال نے مجھے گھر بیٹھے پوسٹ کلونیل افریقی ملک کی رنگارنگ تصویر دکھادی۔ ایک ایسے کردار کی آنکھوں سے افریقہ دکھایا جس میں عام انسان کی ہر خامی موجود ہے۔ جزباتی کمزوری، کاہلی، لالچ۔ نیپال کے سلیم میں پڑھنے والا اپنے آپ کو باآسانی دیکھ سکتا ہے۔ ایک ایسا انسان جو غیرمعمولی حالات میں معمولی زندگی گزارنے کی سرتوڑ کوشش کررہا ہے۔ اپنی تمام خامیوں کے باوجود، سلیم کے کردار میں بے پناہ کشش ہے۔ دنیا خواہ جہنّم کیوں نہ بن جائے، سلیم حالات کا ڈٹ کر مقابلہ کرتا ہے۔

ظاہر ہے اس نوعیت کی کتاب کے مصنّف کا موازنہ کونریڈ سے کیا جاتا ہے۔ اور واقعی، نیپال کونریڈ کے عقلی وارث ہیں۔ شرمناک بات ہے لیکن مجھے "ہارٹ آف ڈارکنیس" پڑھنے میں کچھ دقّت پیش آئی تھی۔ کونریڈ کمال کے ناولسٹ ظرور تھے لیکن ان کی زبان اتنی آسان نہیں۔ کم ازکم مجھ جیسے جاہل کو تو نیپال کی لکھائی زیادہ قدرتی لگتی ہے۔

اکژ لوگوں کو اعتراض ہوتا ہے کہ نیپال اچّھے انسان نہیں۔ ان کے کام کے معیار کو ان کی شخصیت کے ترازو میں تولنا چاہیے۔ پال تھرو کی "سر وڈیاز شیڈو" پڑھنے والا کوئی بھی انسان نیپال کو فرشتہ ہرگز نہیں کہے گا۔ بھلا کیا فضولیت ہے! اگر ہر فنکار کے کام پر معیار کا لیبل لگانے سے پہلے اس کے کردار کو کھودا جائے تو شاید کوئی فنکار عظیم نہ کہلائے۔ نیپال واقعی عظیم فنکار ہیں۔ نوبیل کمیٹی کو "اے بینڈ ان دا رور" پڑھ کر انہیں ایک اور انعام دینا چاہیے۔

چندہ برائے معیّت

2004-12-15T20:55:00.000-05:00

آج ایک عجیب واقعہ پیش آیا۔ ایک صاحب میرے پاس آئے اور ایک چھوٹی سی بچّی کی تصویر میرے سامنے لہراتے ہوئے بولے۔ اس غریب بچّی کا انتقال ہو گیا ہے۔ معیّت اور تدفین کے لیے رقم درکار ہے۔ اس لیے میں چندہ جمع کرتا پھر رہا ہوں۔ آپ کچھ مدد کرسکیں تو اچّھا ہو۔ جی تو چاہا کہ چھان بین کروں۔ پوچھوں کہ یہ بچّی کون ہے؟ آپ سے اس کا کیا تعلق ہے؟ کیا لاش کا مظاہرہ کیا جاسکتا ہے؟ لیکن کچھ کہ نہ پایا۔ بٹوا کھولا تو پانچ کے نوٹ سے کم کچھ نہ تھا۔ مجبورا وہی ان صاحب کے ہوالے کردیا۔ وہ جانیں اور ان کا ایمان۔

سائےفائے چینل

2004-12-15T19:29:00.000-05:00

اگر کوئی جہنّم ہے تو ایک دن سائےفائے چینل والے اس کے نچلے درجوں میں قیام پزیر ہوں گے۔ ارتھسی جیسے شاہکار کو جو لوگ ایسی گھناؤنی شکل دے سکتے ہیں، ان کی یہی سہی جگہ ہے۔ شاید میری اپنی غلطی ہے کہ بلاوجہ معیار کی طوقع کرتا ہوں۔ خیر کچھ عرصے پہلے جو ڈیون کی منی سیریز دکھائی گئی تھی وہ اتنی بری بھی نہیں تھی۔ بلکہ مجھے تو کافی پسند آئی تھی۔ لیکن ارتھسی کا جو نقشہ کھیچا گیا ہے وہ بالکل ناقابلِ قبول ہے۔

کہاں سے شروع کروں؟ نسلی مسئلہ کا تو میں پہلے ذکر کر چکا ہوں۔ چلیں گیڈ کی سفیدگی رو دھو کر برداشت کی جاسکتی ہے۔ لیکن فضول کی رومانیت مشکل سے ہضم ہوتی ہے۔ کوئی بتائے، نوجوان گیڈ ایک حسین لڑکی کے ساتھ کیوں قلاباضیاں کھاتا پھر رہا ہے؟ گیڈ شکل سے بیس سالہ کیوں لگتا ہے؟ ہمارا خیال تھا کہ روک اسکول بچّوں کی جگہ ہے۔ پھر یہ مردوئے وہاں کیا کر رہے ہیں؟ ایرتھ۔ایکبے کی انگوٹھی کو "ایمیولٹ" بنانے کی کیا ضرورت؟ ٹینار ہنستی مسکراتی زندگی کیوں گزار رہی ہیں؟ کیا پرانی طاقتوں کے پجاری اتنے ہنس منکھ ہوتے ہیں؟ گیڈ کا اصل نام سپیروہاک اور عام نام گیڈ کیوں ہے؟ جیسپرس اتنا بڑا بدمعاش کیسے بن گیا؟ اور سب سے بڑی بات یہ منہوس بادشاہ کون ہے جو دنیا فتح کرتا پھر رہا ہے؟ کیا وہ واقعی روک کے جادوگروں کو اتنی آسانی سے شکست دے سکتا ہے؟

لگتا ہے کہ لکھنے والوں نے ارتھسی کے مرکزی خیال کو بالکل نظرانداز کردیا ہے۔ وہ ٹاؤ کیا جو روائیتی قسم کی نیکی اور بدی میں بٹا ہوا ہو؟ اگر ٹاؤ اور توازن کو ارتھسی سے جدا کردیا جائے تو ایک عام سی تلوار و جادوگری کی کہانی رہ جاتی ہے۔ ایسی کہانی جس میں مرد وحشیوں کی طرح لڑتے ہیں، ذور ذور کی آوازیں نکالتے ہیں، اور جادو صرف تشدّد کے لیے استعمال کیا جاتا ہے۔ عورتیں خوبصورت لگتی ہیں اور مردوں کے انتظار میں بیٹھی رہتی ہیں۔ آخرکار بڑی تلوار اور طاقتور جادو والا جیت جاتا ہے۔ ختم شد۔

میں نے احتجاجا دوسری قسط دیکھنے سے انکار کر دیا ہے۔

پاکستانی امریکیوں کی قدامت پسندی

2004-12-12T22:24:00.000-05:00

عید سے کچھ عرصے پہلے میرے پاس ایک عجیب سی ای۔میل آئی۔ چاند رات پر ایک میلے کا اعلان تھا۔ میلے پر کھانے، چوڑیوں، مہندی وغیرہ کے سٹال تھے۔ موسیقی کا بھی انتظام تھا۔ غالبا پاکستان سے کچھ موسیقار خاص طور پر آرہے تھے۔ بالکل ایسا نقشہ تھا جیسے کہ کراچی یا لاہور میں چاند رات ہو۔ ای۔میل کی آخری سطر پر لکھا تھا، صرف خواتیں کے لیے۔۔۔

یہ پڑھ کر میری ہنسی چھوٹ گئی۔ یعنی کمال ہے۔ اکیسویں صدی ہے، امریکہ کی فراخدلانہ ریاست میساچوسیٹس میں یہ اعلان کیا جارہا ہے۔ اور ان قدامت پسند وحشیوں نے اپنی دقیانوسیت کے زہر کو پھیلانے میں کوئی کثر نہیں چھوڑی۔ اب تو شہری پاکستان میں بھی ایسا نہیں ہوتا کہ مردوں اور عورتوں کو جانوروں کی طرح علیحدہ رکھا جائے۔

خیر میں نے ایک جوابی ای۔میل بھیج ڈالی جس کا نچوڑ یہ تھا کہ بھلا یہ کس قسم کی دقیانوسی روایت ہے؟ کسی خاتون کا جواب آیا۔ فرمانے لگیں کہ آپ اپنے تنگ ذہن خیالات اپنے آپ تک مہدود رکھیں۔ میں نے جواب دیا کہ جنسی علیحدگی کے خلاف ہونا کوئی تنگ ذہنی نہیں۔ بلکہ اس کے بالکل برعکس ہے۔ یہ سن کر محترمہ بگڑ گئیں۔ لکھا "وائے ڈونٹ یو شٹ دا فک اپ ناؤ!" ایسی رنگین زبان کا میرے پاس کوئی جواب نہ تھا اسلیے گفتگو اختتام پزیر ہوئی۔

یہی بدقسمتی ہے امریکہ میں مقیم کچھ پاکستانیوں کی۔ ان کا پاکستان اس وقت میں اٹکا ہوا ہے جب وہ وطن چھوڑ آئے تھے۔ وطن کہاں سے کہاں نکل چکا ہے، ان قدامت پسندوں کو خبر نہیں۔ ان کا بس چلے تو یہ تمام عورتوں کو برقعہ پہنا دیں اور سولہ سالہ لڑکیوں کی داڑھی والے متّقی نوجوانوں سے شادی کروادیں۔ ایک طرح سے اچّھا ہے کہ یہ لکیر کے فقیر پاکستان سے باہر ہیں۔ لیکن دوسری طرف یہ اپنے دقیانوسی خیالات امریکہ میں پھیلا کر عام پاکستانیوں کو برا نام دیتے ہیں۔ سب کو سعودی عرب بھجوادینا دینا چاہیے جہاں یہ اپنی جہالت پر کھل کے عمل کرسکیں۔

ارتھسی

2004-12-11T19:31:00.000-05:00

کل سائےفائے چینل پر لیجنڈ آف ارتھسی نامی منی سیریز کا آغاز ہوگا۔ یہ سیریز ارسلا کے لاگوئن کے شاہکار ناولوں پر مبنی ہے۔ سالوں سے یہ ناول میرے پسندیدہ رہیں ہیں۔ آجکل ہیری پاٹر اور جے کے راؤلنگ کے چرچے ہیں۔ لیکن لاگوئن کے تقریبا تیس سال پہلے کے کام میں ہیری پاٹر کے اکثر عنصر نظر آتے ہیں۔ سچّی بات تو یہ ہے کہ ادب کے معروف نقاد ارتھسی کے ناولوں کو ترجیح دیتے ہیں۔

میں یہ نہیں کہ رہا کہ راؤلنگ کا کام غیرمعیاری ہے۔ بھلا میری کیا مجال! میں نے ان کی تمام کتابیں کئی مرتبہ پڑھی ہوئی ہیں۔ لیکن ذہن میں یہ شبہ اکثر کھڑا ہوتا ہے کہ ہیری پاٹر کی مقبولیت کاراز کافی حد تک پبلشر کی مارکٹنگ کی حکمتِ عملی میں ہے۔ لاگوئن کے ناول زیادہ تخلیقی معیار رکھنے کے باوجود بھی اتنی مقدار میں نہیں بکتے۔ اور یہی پبلشنگ کی دنیا کی افسوسناک حقیقت ہے۔

دا وزرڈ آف ارتھسی ایک ایسے بچّے کی کہانی ہے جو معمولی شروعات سے سربراہ جادوگر کے عہدہ تک جاپہنچتا ہے۔ سب سے منفرد بات یہ ہے کہ گیڈ کا دشمن کوئی سیدھا سادھا انسان یا بھوت نہیں بلکہ اسی کے اندر کی برائی کی علامت ہے۔ یعنی خود گیڈ کا سایا۔ لاگوئن ٹاؤ پر یقین رکھتی ہیں اور ان کے خیالات ان کے کام میں اکثر نمایاں ہوتے ہیں۔ نیکی اور بدی ایک ہی تصویر کے دو حصّے ہیں۔ عام کہانیوں میں اچھّے اور برے کی تفریق زوروشور سے کی جاتی ہے۔ ارتھسی میں زندگی اتنی سیدھی سادھی نہیں۔

خیر، اب دیکھنا یہ ہے کہ سائےفائے چینل ایک شاہکار کاحلیہ کیسے بگاڑتا ہے۔ آثار کچھ اچھّے نہیں۔ گیڈ سمیت اکثر مرکزی کردار گوری رنگت کے ہیں جبکہ کتابوں میں ارتھسی کے زیادہ تر رہنے والے بھورے ہیں۔ ٹی وی پر خوش شکل خواتین دکھائی دے رہی ہیں جبکہ کتابوں میں حسین دوشیزاؤں کا کوئی ذکر نہیں۔

بہرحال، امّید پر دنیا قائم ہے۔ چند دنوں میں پتا چلے گا کہ سائے فائے چینل والے ارتھسی کے ساتھ کتنا انصاف کر پائے ہیں۔

گیپ کے اشتہارات اور نسلی تعصّب

2004-12-09T22:25:00.000-05:00

ابھی ابھی ایک گیپ کا اشتہار ٹی وی پر دیکھا۔ اتنے سفید لوگ حقیقت میں تو کم ہی نظر آتے ہیں ہالانکہ میں شہر سے کچھ فاصلے پر رہتا ہوں۔ یعنی کمال ہے، افریقی۔امریکی لوگ بھی ان اشتہاروں میں گورے لگتے ہیں! مجھے آئینے میں جاکر غور سے دیکھنا پڑا کہ کہیں بیٹھے بیٹھے میرا رنگ تو نہیں بدل گیا۔ خیر گیپ والے تو صرف اشتہاری مجرم ہیں۔ ایبرکرومبی اینڈ فچ پر تو لمبا چوڑا مقدمہ چلا کیونکہ ان کی اکثر دوکانوں میں ملازمین کے ساتھ تعصّبی برتاؤ کیا جاتا تھا۔

تہزیبِ ضیاع

2004-12-09T21:55:00.000-05:00

بھیّا کی شادی کی تاریخ طے ہوگئی ہے۔ اب ہمارے قومی مشغلے کا بھرپور مظاہرہ ہوگا، یعنی پیسے کا ضیاع۔

ظاہر سی بات ہے کہ "اسلام" تو سادگی کی تلقین کرتا ہے اور معاشرے کی ہر بری رسم کی طرح شادی بیاہ پر جو دکھلاوے کا بازار گرم ہوتا ہے، اس کا سارا الزام "ہندو ثقافت" پر لگایا جاتا ہے! بہرحال، ثقافت ہندو ہو یا مسلم، اب تو یہ ہماری زندگیوں کا حصّہ بن چکی ہے۔ اور اس زہریلی ثقافت کا تقاضہ ہے کہ عزّت کے نام پر چند سو لوگوں کو لاکھ روپے کے مشروبات پلائے جائیں (شکریہ سپریم کورٹ)۔ ایک آدھ اور لاکھ کپڑوں پر باآسانی صَرف ہوسکتے ہیں۔ لیں جناب، دیکھتے ہی دیکھتے اتنا سب کچھ ایسے مہمانوں کو متاثر کرنے پر خرچ ہو جاتا ہے جن کی زندگی کا مقصد ہی دوسروں پر تنقید کرنا ہے۔

سیدھی سی بات ہے، ایسے موقع پر سچّی خوشی تو بہت کم لوگوں کو ہوتی ہے۔ دو عدد پھوپھیاں تو پہلے ہی نالاں ہے۔ ان کی شرکت ناممکن ہے۔ چچا سدا سے ناراضگی کی منڈیر پر کھڑے ہیں۔ باقی رشتہ داروں میں سے کوئی نہ کوئی تو ضرور مسئلہ کھڑا کرے گا۔ اب دیکھنا یہ ہے کہ خودغرض مہمانوں میں سے کون سب سے زیادہ مزاح کا سامان مہیّح کرتا ہے۔

ایک مسئلہ تو ہل ہوا۔ لڑکی والے مولوی کی غیرحاضری کی شرط پر راضی ہیں۔

تصوّر کرو

2004-12-07T22:50:00.000-05:00

دنیا میں ایک نبی آچکا۔ کسی اور کی کیا ضرورت؟

تصوّر کرو کہ کوئی جنّت نہیں
آسان ہے اگر کوشش کرو
دوزخ نہیں ہمارے نیچے
اوپر کھلا آسمان
تصوّر کرو کہ تمام لوگ
آج کے لیے جیتے ہیں۔۔۔

تصوّر کرو کہ کوئی ملک نہیں
نہیں ہے اتنا مشکل
کچھ نہیں مارنے یا مرنے کے لیے
اور نہ ہی کوئی مزہب
تصوّر کرو کہ تمام لوگ
امن سے زندگی گزار رہے ہیں۔۔۔

تم کہو گے کہ میں خواب دیکھتا ہوں
لیکن میں اکیلا نہیں
امّید ہے اِک دن تم ہمارے ساتھ ہو گے
اور دنیا ایک ہو گی

تصوّر کرو کہ کوئی جائداد نہیں
پتہ نہیں کہ تم کر پاؤ
نہیں ضرورت لالچ یا بھوک کی
انسانیت کی ایک برادری
تصوّر کرو کہ سب لوگ
آپس میں دنیا بانٹ رہے ہیں۔۔۔

تم کہو گے کہ میں خواب دیکھتا ہوں
لیکن میں اکیلا نہیں
امّید ہے اِک دن تم ہمارے ساتھ ہو گے
اور دنیا ایک ہو گی

جان لینَن

شادی اور مولوی

2004-12-06T20:22:00.000-05:00

خوشخبری یہ ہے کہ بھیّا نے شادی کرنے کا اعلان کر دیا ہے! بہت عرصے پہلے ہم دونوں نے تہیّہ کیا تھا کہ ایسے تہوار پر کسی قیمت پر بھی کسی مولوی کو شریک ہونے نہیں دیں گے۔ اب جبکہ اس تہیّہ کا اصل امتحان سر پر ہے، مجھے یہ سن کر خوشی ہوئی کہ بھیّا اپنے ارادے پر اٹل ہے۔ میں نے اپنی ہونے والی بھابھی آفرین سے بھی بات کی اور لگتا ہے کہ وہ بھی کسی انجان مولوی کی شرکت کے خلاف ہیں۔ اب صرف والدین کو روشنی دکھانے کا مسئلہ باقی ہے۔

بھیّا کی مولوی مخالف تحریک کی اپنی وجوح ہوں گی۔ مجھے تو کئی سطحوں پر مسئلہ ہے۔ اوّل تو یہ کہ شادی دو فریقین کے درمیان کا معاہدہ ہے۔ اس کے بیچ میں خدا کو لانے کی کیا ضرورت؟ دویم، اگر معاشرہ مزہبی دکھلاوے کا طلب گار ہے بھی، تو گھر کا کوئی فرد باآسانی یہ فریضہ پورا کر سکتا ہے۔ ایک جاہل، لچر مولوی کی کوئی ضرورت نہیں۔

ایک اور بات۔ ہم عرب تو نہیں ہیں اور نہ عربی زبان سے کوئی خاص واقفیت رکھتے ہیں۔ پھر یہ شادی کے موقع پر عربی میں ٹر ٹر کیوں کی جاتی ہے جسے کوئی نہیں سمجھتا؟ اس سے کہیں بہتر ہے کے فیض صاحب کی کوئی اچھّی سی نظم پڑھی جائے تاکے مہمان بھی لطف اندوز ہوں اور دولہا اور دلہن اپنے احساسات کا اظہار نظم کے ذریے کر سکیں۔

وبائے مادہ پرستی

2004-12-04T18:40:00.000-05:00

کل میری پیاری ماموں زاد بہن سحر ایک انٹرویو کے لیے باسٹن آئی۔ بہت لائق لڑکی ہے۔ ییل میں نسوانیات سمیت دیگر لبرل آرٹس کی طالبہ ہے۔ بڑی خوشی کی بات ہے، نوکری تو اسے مل گئی۔ ظاہر ہے، کیوں نہ ملتی؟ کمپنی باسٹن میں ہے، اور "کنسلٹنگ" کے شعبے میں مہارت رکھتی ہے۔ لیکن مجھے حیرت اس بات پر ہے کی اتنی لائق لڑکی "کنسلٹنگ" یا "اِنوسٹمنٹ بینکاری" کے شعبوں سے آگے نہیں سوچتی۔

مسئلہ صرف سحر کی نوکری کا نہیں ہے۔ نوکری تو اسے کہیں بھی مل سکتی ہے۔ مسئلہ ایک پوری نسل کا ہے جس پر مادہ پرستی کا بھوت چھایا ہوا ہے۔ یہ وبا کوئی نئی نہیں۔ جب میں کالج میں تھا تو اکثر لوگ یہ سن کر برا سا منہ بناتے تھے کہ میں ریاضیات پڑھنے کا خواہشمند ہوں۔ اس وقت بھی ایم۔بی۔اے کا بول بالا تھا۔ جوک در جوک لوگ بزنس اسکول کا رخ کررہے تھے اور ایم۔آئی۔ٹی جیسی جگہ میں بھی سائنس یا انجنیرنگ کے بجائے وال سٹریٹ کی تحزیب رونما ہونے لگی تھی۔

خیر میں نے تو آسان اور درمیانہ راستہ اختیار کیا۔ ایک سافٹویر کمپنی میں ملازمت اختیار کر لی۔ میرے دوست اسد نے اصولوں پر سودے بازی نہیں کی اور آج یورپ میں طبیعیات کا ڈاکٹر ہے۔ لیکن راستہ دشوار تھا اور اس کے آگے کے بچّے، جنہوں نے بمشکل کالج گزارا تھا، آج وال سٹریٹ پر اتراتے پھرتے ہیں۔

کاروباری زمانہ ہے، اور ہمارے والدین بھی اسی زمانے کے افراد ہیں۔ بجائے قابلیت اور تعلیم پر ذور دینے کے، آجکل کے والدین بھی پیسے کے پجاری ہیں۔ اور اگر نہیں بھی ہیں تو اپنے گرداگرد کے مادہ پرستوں کے تعنے برداشت نہیں کر پاتے۔ انہیں بھی اپنے بچّوں سے وال سٹریٹ یا سلیکون ویلی کی سونے کی اینٹوں کی توقع ہے۔ اگر حالات اسی طرح رہے تو دنیا کے سائینسدان، فنکار، مصنف، غرض یہ کہ کوئی بھی تخلیقی کام کرنے والے کہاں سے آئیں گے؟ اگر تمام کالج گریجوئٹ مینیجر یا بینکار یا کنسلٹنٹ بن گئے تو اصلی کام کون کرے گا؟

یہ تو تھی سنجیدہ بات۔ ماموں اور ممانی سحر کی نوکری کی خبر سن کر بہت خوش ہوئے۔ پیاری ممانی جان ساری رات سحر کی کامیابی کی دعائیں مانگتی رہیں! لگتا ہے کچھ فائدہ ہو ہی گیا۔

بروس وین: قاتل؟

2004-12-02T21:29:00.000-05:00

بیٹ مین کا ایک اصول ہے: تشدّد کا استعمال جائز ہے لیکن ایک انسان کو کسی بھی صورت میں قتل نہیں کیا جاسکتا۔ باوجود اس کے کہ جوکر نے دوسرے رابن جیسن ٹاڈ کو بری طرح جان سے مار دیا تھا، بیٹ مین نے جوکر کو زندہ رہنے دیا۔ یہی اصول ہے جو بیٹ مین کو جوکر جیسے خونیوں سے منفرد کرتا ہے۔ اس اصول کی تقدیس پڑھنے والوں کے ذہنوں پر اس بری طرح چھائی ہوئی ہے کے بروس وین: مرڈرر کا پہلا ورق پلٹنے سے پہلے ہی ہر سچّے مداح کو یقین ہونا چاہیے کہ بروس بے گناہ ہے۔

بروس کی بےگناہی تو کوئی تعجب کی بات نہیں۔ بیٹ مین: مرڈرر کا کمال ایک انوکھے خیال میں ہے۔ آج تک سب سمجھتے آئے ہیں کہ بروس حقیقی انسان ہے اور بیٹ مین صرف ایک نقاب۔ لیکن اگر حالات اس کے بر عکس ہوں تو کیسا رہے، یعنی کہ بیٹ مین حقیقی ہو اور بروس وین صرف ایک نقاب! یہی بروس وین: مرڈرر کا مرکزی خیال ہے۔

ویسے تو ہم سب نقاب پہنتے ہیں۔ فرق یہ ہے کہ بروس کا نقاب مکمل ہے، جسے پہن کر اس کی شخصیت ہی تبدیل ہو جاتی ہے۔ اصل صلاحیت صرف نقاب پہنّے میں نہیں بلکہ کئی نقاب اس طرح اتارنے چڑھانے میں ہے کہ انسان کی تمام شکلیں ایک دوسرے سے جدا رہیں۔

فلسطینی حقِ واپسی

2004-11-30T23:09:00.000-05:00

کچھ دنوں پہلے پاکستانی اخبار ڈان نے فلسطینی پناہ گیروں کے حقِ واپسی پر ایک پراثر اداریہ شائع کیا۔ اقوامِ متحدہ کی قرارداد ۱۹۴، انسانی حقوق کے عالمی منشور کی دفعہ ۱۳(۲)، اور چوتھی جنیوا کنونشن ہر پناہ گیر کو اپنے وطن لوٹنے کا حق دیتیں ہیں۔ اگر بینالاقوامی قانون کی دنیا میں کوئی حیثیت ہے تو حقِ واپسی کو جھٹلایا نہیں جا سکتا۔ لیکن کیا پاکستانی اخبار میں ایسی بات ہونے سے منافقت کی بو نہیں آتی؟

میرے والد صاحب کے ایک بچپن کے دوست تقسیم کے وقت اپنے خاندان سمیت پناہ گیر بن گئے تھے۔ ان کی پیدائش سندھ کی ہے اور ان کے آباؤ اجداد صدیوں سے کراچی کے قریب ایک گاؤں میں آباد تھے۔ ۱۹۴۷؁ میں ان کا سارا کنبہ سندھ سے بھاگ کر جےپور آپہنچا۔ آج وہ بےپناہ چاہنے کے باوجود بھی اپنے آبائی گاؤں نہیں جاسکتے۔ کیا ڈان اخبار کے مدیر میرے منہ بولے چچا اور ان کے جیسے لاکھوں ہندؤں کے لیے بھی حقِ واپسی طلب کریں گے؟

تقسیم کے سوال کو چھوڑیے۔ بنگلہ دیش میں جو لاکھوں مہاجرین کی حالتِ زار ہے، کیا اس کے بارے میں ڈان نے کبھی اداریہ لکھا ہے؟ یہ لوگ اپنے آپ کو پاکستانی کہتے ہیں۔ بنگلہ دیش میں انہیں شہریت نہیں مل سکتی۔ لیکن کیا پاکستانی حکومت ۱۵ کڑوڑ کی آبادی میں چند لاکھ مہاجرین کو خوش آمدید کہ رہی ہے؟ تو پھر ڈان کے مدیر اسرائیل سے کیوں مطالبہ کر رہے ہیں کے وہ ۶۷ لاکھ کی آبادی میں ۴۰ لاکھ میاجرین کے لیے جگہ بنائے؟

حبّ الوطنی اور مقناطیس

2004-11-29T19:54:00.000-05:00

لگتا ہے تمام کا تمام امریکہ حبّ الوطنی کے بخار میں مبتلا ہے۔ ہر دوسری گاڑی پر سٹکر لگا ہے: ہمارے فوجیوں کو سہارا دیں۔ جیسے کہ قاتل فوجیوں کو سہارے کی ضرورت ہے! یہ کوئی عام سٹکر بھی نہیں، بلکہ ربن کی شکل کے مقناطیس ہیں جو کے بغیر کسی نشان کے گاڑی پر باآسانی چپک جاتے ہیں۔

ایبی نے حبّ الوطن گاڑیوں سے بیزار ہو کر ایک نئے مہم کا اعلان کیا۔ آگ کا مقابلہ آگ سے کیا جاتا ہے۔ اسلیے جنگجو سٹکروں کا توڑ امن پسند سٹکروں میں ہے۔ یہ خوبصورت سٹکر ۴ ڈالر کی معمولی قیمت پر آپ کے ہو سکتے ہیں۔ دو ڈیزائن دستیاب ہیں: امن کا بین الاقوامی نشان یا اینیبڈی بٹ بش کی تہریر۔ مقناطیس گاڑی کی کسی بھی سطح پر چپک جاتا ہے اور بارش یا برف سے بھی محفوظ ہے۔

بیٹ مین

2004-11-28T20:02:00.000-05:00

میرا بیٹ مین کا شوق جنون کی حد تک بڑھ چکا ہے۔ بیٹ مین کے کامکس، بیٹ مین کے گرافک ناول، بیٹ مین کے کارٹون: روزانہ ایک آدھ گھنٹا ان کی نذر ہو جاتا ہے۔ جانے کیسا جادو ہے اس کردار میں! بچّے تو سوپرمین کے دیوانے ہوتے ہیں۔ موصوف اڑتے ہیں، خوب طاقتور ہیں، آنکھوں سے موضی شعاعیں مارتے ہیں، اور دل کے بہت اچھے ہیں۔ بھلا بیٹ مین سے کیا مقابلہ؟

بیچارا بروس وین: نہ تو اڑ سکتا ہے، نہ غیرمعمولی طاقت رکھتا ہے۔ لیکن شاید اس کی انسانیت میں ہی اس کی بےپناہ کشش کا راز ہے۔ عام انسان کا سوپرمین سے کیا تعلق؟اسے زندگی کی تمام دشوارئیوں کا سامنا اپنی ا انسانی صلاحیتوں سے کرنا پڑتا ہے۔ اس کے لیے بیٹ مین سے بہتر کیا مشال؟ ایک ایسا آدمی جو اپنی کمزور انسانیت کے باوجود خدائوں سے برابری کرتا ہے۔ اور اکثر ان سے آگے نکل جاتا ہے۔

بیٹ مین سوپر مین کی طرح کوئی بوائے سکاوٹ نہیں۔ اس کے اندر ایک خوفناک تاریکی ہے۔شاید کسی سطح پر اس میں اور اس کے وحشتناک دشمنوں میں اتنا ذیادہ فرق نہیں۔ وہ کیا چیز ہے جو ایک انسان کو خونی قاتل بناتی ہے اور دوسرے کو جرم کا دشمن، جبکہ دونوں ہی کا دماغی توازن عام انسان سے بہت مختلف ہوتا ہے؟ اس معمّے کا نامکمل جواب بیٹ مین میں موجود ہے۔

کچھ عرصہ پہلے میں نے پاکستان میں دہشت گردی سے اکتا کر ایک نیم حقیقی کہانی لکھی جس کی بنیاد بیٹ مین میں تھی۔ ذرا سوچیے! اگر کوئی پاکستانی بیٹ مین ہوتا جو ہمیں ان وحشیوں سے چھٹکارا دلا سکتا۔ ڈر کر نہیں، پیار اور بات چیت سے نہیں بلکہ ایسی زبان میں جسے دحشت گرد بخوبی سمجھتے ہیں: خوف اور دحشت کی زبان۔

افسوس کہ میرا شاہکار فرائڈےٹائمز میں تو نہ چھپ سکا۔ لیکن انٹرنیٹ سائٹ چوک پر اسے جگہ مل گئی۔

تھینکسگونگ اور مذہب

2004-11-25T21:48:00.000-05:00

اگر مقامی امریکیوں کی نسل کشی کو کچھ دیر کے لیے نظرانداز کیا جائے تو تھینکسگونگ کا تہوار کچھ ایسا برا نہیں۔ ویسے تو ہر تہوار کا کوئی نہ کوئی منفی پہلو ہے۔ عید اور کرسمس مذہبی نوعیت رکھتے ہیں، اس لیے دونوں ہی تہوار ملحدین (یعنی لامذہب یا غلط مذہب پر یۡقین رکھنے والوں) کو باہر کر دیتے ہیں۔ بکرا عید پر تقوی کے نام پر جانوروں کا قتلِ عام ہوتا ہے اور معصوم بچّوں کو ظلم اور تشدّد کا سبق دیا جاتا ہے۔ یوم آزادی مناتے ہوئے ہم بھول جاتے ہیں کہ تقسیم کے وقت کیا کیا مظالم ڈھائے گئے تھے۔ وغیرہ وغیرہ۔

تھینکسگونگ شاید ان مثائل سے پاک ہے۔ اس سے بہتر کیا تہوار ہو سکتا ہے کہ انسان اپنے خاندان کے ساتھ بیٹھ کر زندگی کی تمام نعمتوں پر شکرگزار ہو سکے اور لمبی چوڑی دعوت اڑا سکے؟ لیکن یہ صرف میری خوش فہمی تھی۔ تھینکسگونگ کو بھی مذہب کی دیمک لگی ہوئی ہے۔

جیسے ہی کھانے کا وقت ہوا، ایبی کے سوتیلے والد نے اعلان کیا کہ دعا کی جائے۔ تمام بھوکے مہمانوں نے ادباً سر جھکائے اور ایک آواز سے مٹرنے لگے: اس کھانے کو برکت دے اور ہماری زندگیوں کو اپنی خدمت میں منظور کر ، ہم تجھ سے عیسی کے نام پر مانگتے ہیں، آمین۔

بس جناب، جیسے ہی خدمت کا ذکر ہوا، میری ہنسی چھوٹ گئی۔ بڑی مشکل سے اپنے اوپر قابو پایا۔ کمال ہے، اکیسویں صدی شروع ہو چکی ہے، پہلی دنیا کا جدید ملک ہے اور پڑھے لکھے لوگ حضرت عیسیٔ کے نام پر کھانا طلب کر رہے ہیں! جی چاہتا ہے کہ کینیڈا یا یورپ چلا جائوں۔ آخر کہیں تو جہالت سے چھٹکارا ملے۔ یا پھر کوئی وقت کی مشین ہوجو مجھے سو سال آگے لے جائے۔ شاید تب اس وبا کا خاتمہ ہو چکا ہو۔

مثالی مائیں

2004-11-24T21:48:00.000-05:00

کبھی کبھار میں پاکستانی اخبار دا فرائیڈے ٹائمز کے لیے مضمون وغیرہ لکھتا ہوں۔ بہت ترقی پسند لوگ ہیں۔ کئ ایسی باتیں جو کہ دوسرے کسی پاکستانی اخبار میں پڑھنے کو نہیں ملتیں وہ فرائڈے ٹائمز والے بلا جھجک چھاپ دیتے ہیں۔ اس ہفتے میں نے "مثالی مائیں" نامی کتاب کے بارے میں ایک مضمون لکھا۔ اتفاق سے کتاب کی مصنفہ میری سگی خالہ ہیں۔ بچوں کی کتاب ہے، اور اس میں ان تاریخی مائوں کا ذکر ہے جنہیں پیاری بجو خالہ "عظیم" سمجھتی ہیں۔

خیال تو برا نہیں۔ مگر افسوس کہ تمام کی تمام مثالی مائوں کی صرف یہ خوبی ہے کہ ان کے بیٹے (یعنی مرد) کوئی بڑے انسان تھے۔ خود ان عورتوں کی اپنی کوئی شناخت نہیں۔ ان کی زندگی کا صرف ایک مقصد ہے، اور وہ ہے بچوں کو جنم دینا۔

میں نے کہیں یہ لکھ ڈالا کہ اگر عقل کی نگاہ سے دیکھا جائے تو حضرت محمدؐ کی والدہ حضرت آمنہؓ اور میری اپنی پیاری امی جان میں کتنا فرق ہے؟ میری امی (خدا انہیں لمبی عمر دے) خوش صحت ہیں جبکہ حضرت آمنہؓ کا انتقال حضرت محمدؐ کی چھٹی سالگرہ کے آس پاس ہو گیا تھا۔ میری امی نے اپنی زندگی کے بہترین سال بچوں کی نذر کر دیے، جبکہ حضرت آمنہؓ نے بیٹے کو دائی حلیمہ کے حوالے کر دیا تھا۔ اس کے علاوہ حضرت آمنہؓ نے کبھی اسکول کے بعد، تپتی دھوپ میں بندر روڈ پر گاڑی بھی نہیں چلائی۔

فرائڈے ٹائمز کی مدیرہ یہ پڑھ کر ذیادہ خوش نہ ہوئیں۔ کہنے لگیں، ہمیں لگتا ہے کہ آپ کوئی خفیہ جہادی ہیں اور ہمارا دفتر جلوانا چاہتے ہیں! بہرہال، کاٹ پیٹ کر مضمون چھاپ ہی دیا۔ لیکن کچھ بات نہیں بنی۔

جائس کیرل اوٹس سے ایک ملاقات

2004-11-24T20:18:00.000-05:00

کل عجب واقعہ پیش آیا۔ معروف مصنفہ جائس کیرل اوٹس نے باسٹن پبلک لائبریری میں اپنی نئ کتاب "دا فالز" سے چند اقتباسات پڑھے۔ یہ ناچیز بھی موجود تھا۔ شام کا وقت تھا۔ ایبی اور میں دفتر سے جلدی اٹھ کر لائبریری پہنچے۔ سخت نیند آرہی تھی۔ جائس کو پڑھتے ہوئے کوئی پانچ منٹ ہی ہوئے ہوں گے کہ میری آنکھ لگ گئ۔ پھر جانے کیا ہوا، مت پوچھیں۔ جب ہوش آیا تو حاضرین تالیاں بجا رہے تھے۔ میں نے بھی بھرپور داد دی۔ بعد میں ایبی نے بتایا کہ مجھے سوتے سوتے ایک گھنٹے سے بھی زیادہ وقت ہو گیا تھا!

جائس کیرل اوٹس کے الفاظ سے تو مستفید نہ ہو پایا۔ ان کی کتاب پڑھنےکی کوشش ضرور کروں گا۔

ضیاء کون ہے؟

2004-11-24T19:35:00.000-05:00

میں ایک ناکام سائینس فکشن لکھنے والا مصنف ہوں۔ اردو زبان میں شاید سائینس فکشن پڑھنے یا لکھنے کی کوئی خاص روایت نہیں۔ شاید اسی وجہ سے میں انگریزی کے رسائل کے مدیروں سے مایوسکن خطوط وسول کرنے کا عادی ہو گیا ہوں۔

مشہور رسالے "اینلاگ" کے نامور مدیر سٹینلی شمڈ نے میری ایک کہانی "دا ٹریولر" کو خوب سراہا۔ لیکن ان کے خیال سے یہ کہانی کچھ زیادہ ہی ناامیدی کا پیغام رکھتی ہے۔ ان کے پڑھنے والے ایسی کہانیاں پسند کرتے ہیں جن میں روشنی کی ایک نہ ایک کرن ضرور ہو۔ اس کہانی کو آخرکار ایک گھر مل ہی گیا ہے۔

ابتدا

2004-11-23T22:30:00.000-05:00

ضیاء احمد کا باسٹن سے آداب۔